வாழைப்பழத் தோலில் இருந்து வீகன் லெதர்: டில்லி பல்கலை மாணவர்களுக்கு பீட்டா இந்தியா விருது!

டில்லி பல்கலைக்கழகத்தின் ராம்ஜாஸ் கல்லூரி மாணவர்கள் வீகன் லெதரை உருவாக்க வீணாக எறியப்படும் வாழைப்பழத் தோல்களைப் பயன்படுத்தி ஒரு புதிய கண்டுபிடிப்பை நிகழ்த்தியுள்ளனர். இந்தச் சாதனைக்காக அம்மாணவர்களுக்கு விலங்குகள் நல அமைப்பான பீட்டா இந்தியா “விலங்குகளுக்கான இளம் மாற்றத்தை உருவாக்குபவர் விருது”  வழங்கி கௌரவித்துள்ளது.

சமூக மேம்பாடு மற்றும் சுற்றுச்சூழல் பாதுகாப்பை நோக்கமாகக் கொண்டு இயங்கும் ‘எனாக்டஸ் ராம்ஜாஸ்’ அமைப்பைச் சேர்ந்த மாணவர்கள், சுமார் ஒரு வருட தீவிர முயற்சிக்குப் பிறகு வாழைப்பழத் தோலில் இருந்து இந்த வீகன் லெதரை தயாரித்துள்ளனர். இந்த புதிய வகைப் பொருளுக்கு “சேஹர்”  என்று பெயரிட்டுள்ளனர்.

இந்த முயற்சியைக் குறித்து எனாக்டஸ் ராம்ஜாஸ் அமைப்பின் தலைவர் கனிஷ்கா யாதவ் கூறியதாவது: தோல் பொருட்களுக்காகப் பசுக்களும் எருமைகளும் கொண்டு செல்லப்படும் போதும், இறைச்சிக் கூடங்களிலும் சந்திக்கும் கொடூரமான சித்ரவதைகள் எங்களை ஆழமாகப் பாதித்தன. அதற்கு மாற்றாக ஒரு இரக்கமுள்ள வழியைக் கண்டுபிடிக்க விரும்பினோம். அதே நேரத்தில், பழக் கழிவுகள் சுற்றுச்சூழலுக்கு ஏற்படுத்தும் சவால்களையும் கண்டோம். இந்த இரண்டு பிரச்சனைகளுக்கும் தீர்வாக உருவானதுதான் ‘சேஹர்’. இது விலங்குகளின் துயரத்தைப் போக்குவதுடன், கழிவுகளையும் பயனுள்ள பொருளாக மாற்றுகிறது.”

மாணவர்கள் இந்த லெதரை உருவாக்குவதற்கு முன்பாக ஆரஞ்சு, மாம்பழம், அன்னாசி மற்றும் தேங்காய் போன்ற பல்வேறு பழக் கழிவுகளைக் கொண்டு பல கட்ட ஆராய்ச்சிகளை மேற்கொண்டு தோல்வியடைந்தனர். இறுதியாக, பேராசிரியர்களின் வழிகாட்டுதலோடு வாழைப்பழத் தோலே வலுவான, நெகிழ்வுத்தன்மை கொண்ட லெதர் போன்ற தாள்களை உருவாக்க உகந்தது என்பதைக் கண்டறிந்தனர்.

இப்போது இந்த ‘சேஹர்’ வீகன் லெதர் மூலம் பணப்பைகள், கைப்பைகள், டைரி கவர்கள் மற்றும் ஆடை அலங்காரப் பொருட்கள் தயாரிக்கப்பட்டு வருகின்றன.

சர்வதேச இளைஞர் தினத்தை (ஆகஸ்ட் 12) முன்னிட்டு அம்மாணவர்களின் இந்த முயற்சி அங்கீகரிக்கப்பட்டுள்ளது.

தோல் பதனிடும் தொழிற்சாலைகளில் பயன்படுத்தப்படும் இரசாயனங்கள் நீர்நிலைகளையும் மனித ஆரோக்கியத்தையும் பாதிப்பதாக பீட்டா சுட்டிக்காட்டியுள்ளது. மேலும், அன்னாசி இலைகள், கார்க், மரக்காளான், தென்னை கழிவுகள் போன்ற தாவர அடிப்படையிலான மாற்றுகள் வேகமாக வளர்ந்து வரும் நிலையில், ராம்ஜாஸ் மாணவர்களின் இந்த கண்டுபிடிப்பு  ஃபேஷன்  துறைக்கு ஒரு பெரிய வழிகாட்டியாக அமையும் எனக் கருதப்படுகிறது.