உத்தரப் பிரதேச மாநிலத்தில் அண்மையில் நடைபெற்ற ஒரு விசித்திரமான மற்றும் அதிர்ச்சியளிக்கும் சம்பவம் இணையதளங்களில் வைரலாகபரவி வருகிறது. ஆட்டைக் வேட்டையாட வந்த 15 அடி நீள மலைப்பாம்பை, மதுபோதையில் இருந்த நபர் ஒருவர் பயமின்றி கையாண்டு தனது கழுத்தில் மாலை போலச் சுற்றிக் கொண்டு சாகசம் செய்துள்ளார்.
உத்தரப் பிரதேச மாநிலம் பாராபங்கி பகுதியில் அமைந்துள்ள ஒரு மட்டன் கடைக்குள், சுமார் 15 அடி நீளமுள்ள பிரம்மாண்ட மலைப்பாம்பு ஒன்று எதிர்பாராதவிதமாகப் புகுந்தது. கடையில் கட்டப்பட்டிருந்த ஆடுகளை இரையாக்கிக் கொள்ள அந்த மலைப்பாம்பு மெதுவாக உள்ளே நுழைந்தது.
திடீரென இவ்வளவு பெரிய பாம்பைக் கண்ட கடை உரிமையாளரும், அங்கிருந்த வாடிக்கையாளர்களும் அலறியடித்துக் கொண்டு நாலாபுறமும் ஓட்டம் பிடித்தனர். அங்கு பெரும் பரபரப்பும் பயமும் நிலவிய சூழலில், சுரேஷ் என்ற நபர் அளவுக்கு அதிகமாக மது அருந்திய நிலையில் அங்கு வந்துள்ளார்.
பாம்பைக் கண்டு அச்சப்படாமல், தனது உயிரைப் பற்றிய கவலையின்றி அந்த பிரம்மாண்ட மலைப்பாம்பை வெறும் கையாலேயே சுரேஷ் பிடித்துள்ளார். பிடிபட்ட மலைப்பாம்பு அவரது கையை இறுகக் சுற்றி கடிக்க முயன்றபோதிலும், போதை மயக்கத்தில் இருந்த சுரேஷ் அதைப் பொருட்படுத்தாமல் அதைத் தூக்கித் தன் கழுத்தில் மாலையைப் போலச் சுற்றிக் கொண்டார்.
அது தப்பித்துக்கொள்ளும் முயற்சியில் சுரேஷின் கையை ஓரிரு முறை கடித்தது, ஆனால் மலைப்பாம்புகள் விஷமற்றவை என்பதால் ஒன்றும் நடக்கவில்லை. தெருவில் நின்று கொண்டு அந்த பாம்புடன் அவர் செய்த விபரீத சாகசங்களைக் கண்டு சுற்றி நின்ற மக்கள் அதிர்ச்சியிலும் திகிலிலும் உறைந்து போயினர்.
சிறிது நேரத்திற்குப் பிறகு போதை சற்றே தெளிந்த நிலையில், சுரேஷ் அந்த மலைப்பாம்பை ஒரு பெரிய டப்பாவிற்குள் பாதுகாப்பாக அடைத்தார். பின்னர், அருகில் இருந்த ஒரு நீர்நிலைக் கால்வாய்ப் பகுதிக்கு எடுத்துச் சென்று அதை பத்திரமாக விடுவித்தார். டப்பாவில் இருந்து வெளியேறிய பாம்பு தன் ஆத்திரத்தின் இறுதி வெளிப்பாடாக, தன் தலையை சுமார் மூன்று அடி உயரத்திற்கு உயர்த்தி பார்த்துவிட்டு மெதுவாக வனப்பகுதியை நோக்கி நகர்ந்து சென்றது.
இந்த அதிர்ச்சியூட்டும் சம்பவத்தின் வீடியோக்கள் தற்போது சமூக வலைதளங்களில் வைரலாகி வருகின்றன.
