ஸ்காட்லாந்தின் கிளாஸ்கோ நகரில் நடைபெற்று வரும் 2026 காமன்வெல்த் விளையாட்டுப் போட்டிகளின்10ஆம் நாள் போட்டிகளில், இந்திய விளையாட்டு வீரர்கள் வரலாற்றுச் சிறப்புமிக்க ஆட்டத்தை வெளிப்படுத்தியுள்ளனர்.
ஒரே
நாளில் தங்கம், வெள்ளி மற்றும் வெண்கலம் என மொத்தம் 16 பதக்கங்களை வாரிக் குவித்து இந்திய அணி வரலாற்றுச் சாதனை படைத்துள்ளது. இந்த அபாரமான வெற்றியின் மூலம், இந்தியாவின் மொத்த பதக்க எண்ணிக்கை 39-ஆக (13 தங்கம், 17 வெள்ளி, 9 வெண்கலம்) உயர்ந்து, பதக்கப் பட்டியலில் இந்தியா 4-வது இடத்திற்கு முன்னேறியுள்ளது.
குத்துச்சண்டையில் வரலாற்றுப் சாதனை: 7 தங்கம், 3 வெள்ளி!
10ம் நாளின் மிகப்பெரிய சிறப்பம்சமாக இந்திய குத்துச்சண்டை வீரர்கள் களமிறங்கிய 10 இறுதிப் போட்டிகளிலுமே பதக்கங்களை வென்று முத்திரை பதித்தனர். இதில் 7 தங்கப் பதக்கங்களும், 3 வெள்ளிப் பதக்கங்களும் அடங்கும்.
தங்கப் பதக்கம் வென்றவர்கள்:
- சாட்சி சவுத்ரி (மகளிர் 51கிலோ): இங்கிலாந்தின் ரூபி வைட்டை 5-0 என்ற கணக்கில் வீழ்த்தி தங்கம் வென்றார்.
- பிரீதி பவார் (மகளிர் 54கிலோ): கனடாவின் ஸ்கார்லெட் டெல்காடோவை 5-0 என வீழ்த்தி தங்கப் பதக்கத்தை தட்டினார்.
- ஜேஸ்மின் லம்போரியா (மகளிர் 57கிலோ): நடப்பு சாம்பியனான வடக்கு அயர்லாந்தின் மைக்கேலா வால்ஷை வீழ்த்தி தங்கம் வென்றார்.
- பிரியா கங்காஸ் (மகளிர் 60கிலோ): கனடாவின் மேரி-பாதுல் அல்-அஹ்மதியாவை 4-1 என்ற கணக்கில் தோற்கடித்து தங்கம் வென்றார்.
- அருந்ததி சவுத்ரி (மகளிர் 70கிலோ): இங்கிலாந்தின் சான்டெல்லி ரீடை 5-0 எனத் தோற்கடித்து தங்கம் வென்றார்.
- சச்சின் சிவாச் (ஆடவர் 60கிலோ): நமீபியாவின் டிரைஅகேன் என்டேவெலோவை 3-2 என்ற கணக்கில் வீழ்த்தி ஆடவர் பிரிவில் முதல் தங்கத்தை வென்றார்.
- அங்குஷ் பங்கால் (ஆடவர் 80கிலோ): இங்கிலாந்தின் டிமேஜி ஷிட்டூவை 4-1 என வீழ்த்தி இந்தியாவின் 7-வது குத்துச்சண்டை தங்கத்தை உறுதி செய்தார்.
வெள்ளிப் பதக்கம் வென்றவர்கள்:
- லவ்லினா போர்கோஹைன் (மகளிர் 75கிலோ): ஆஸ்திரேலியாவின் எம்மா-சூ கிரீண்ட்ரீயிடம் 1-4 எனப் போராடித் தோற்று வெள்ளிப் பதக்கம் வென்றார்.
- ஜடுமணி சிங் (ஆடவர் 55கிலோ): ஆஸ்திரேலியாவின் ஜெய் டிக்சனிடம் தோல்வியுற்று வெள்ளிப் பதக்கம் பெற்றார்.
- நரேந்தர் பெர்வால் (ஆடவர் +90கிலோ): இங்கிலாந்தின் தாமர் தாமஸிடம் தோல்வியடைந்து வெள்ளிப் பதக்கம் வென்றார்.
தடகளம் மற்றும் பாரா-தடகளத்தில் இரட்டைப் பதக்கங்கள்!
குத்துச்சண்டையைத் தவிர, தடகளப் போட்டிகளிலும் இந்திய வீரர்கள் கொடிகட்டிப் பறந்தனர்:
பாரா குண்டு எறிதல் (F57 பிரிவு): இந்திய வீரர்கள் முதல் இரண்டு இடங்களைப் பிடித்து வரலாற்றுச் சாதனை படைத்தனர். சோமன் ராணா 13.40 மீட்டர் தூரம் எறிந்து தங்கப் பதக்கத்தையும், சுபம் ஜூயல் 13.28 மீட்டர் தூரம் எறிந்து வெள்ளிப் பதக்கத்தையும் வென்றனர்.
ஆடவர் ட்ரிபிள் ஜம்ப்: பிரவீன் சித்ரவேல் 16.58 மீட்டர் தூரம் தாண்டி வெள்ளிப் பதக்கத்தையும், செல்வா பிரபு திருமாறன் 16.52 மீட்டர் தூரம் தாண்டி வெண்கலப் பதக்கத்தையும் வென்று இந்தியாவிற்கு இரட்டைப் பதக்கம் ஈட்டித் தந்தனர்.
ஆடவர் 5000 மீட்டர் ஓட்டம்: இந்திய நீண்ட தூர ஓட்டப்பந்தய வீரர் குல்வீர் சிங் 13:24.95 வினாடிகளில் இலக்கை அடைந்து வெண்கலப் பதக்கம் வென்றார். இதன் மூலம் நடப்பு காமன்வெல்த்தில் தனது 2-வது பதக்கத்தைப் பதிவு செய்தார்.
ஜூடோவில் வெண்கலப் பதக்கம்
மகளிர் ஜூடோ -63கிலோ எடைப்பிரிவு வெண்கலப் பதக்கத்திற்கான போட்டியில், இந்தியாவின் உன்னதி சர்மா தென்னாப்பிரிக்காவின் ஸ்கை க்னோஸ்டரை வெறும் 1 நிமிடம் 7 வினாடிகளில் ‘இப்பான்’ முறையில் வீழ்த்தி வெண்கலப் பதக்கம் வென்றார்.
காஸ்கோ 2026 காமன்வெல்த் போட்டிகளில் இந்திய வீரர்களின் இந்த அசத்தல் செயல்பாடு, ஒட்டுமொத்த இந்திய விளையாட்டு ரசிகர்களுக்கும் பெரும் மகிழ்ச்சியையும் பெருமையையும் அளித்துள்ளது!
