தமிழக அரசின் சத்துணவு திட்டத்திற்கு, அரசு நிர்ணயித்துள்ள எடையளவான, 45 கிராம் எடைக்கும் மேல் உள்ள முட்டைகள் மட்டுமே சப்ளை செய்யப்படுகின்றன என என்இசிசி தலைவர் கூறினார். இது குறித்து, நாமக்கல் மண்டல தேசிய முட்டை ஒருங்கிணைப்புக்குழு (என்இசிசி) தலைவர் சிங்கராஜ் செய்தியாளர்களிடம் கூறியதாவது:
தமிழக அரசின் சத்துணவு திட்டத்திற்கு, தினமும், 55 லட்சம் முட்டைகள் சப்ளை செய்யப்படுகிறது. எடை குறைவான முட்டைகள் சத்துணவு திட்டத்திற்கு வழங்கப்படுவதாக சிலர் புகார் கூறுவது உண்மையல்ல. ஒப்பந்தத்தில் அரசு நிர்ணயம் செய்துள்ள 45 கிராமிற்கு மேல் எடையுள்ள முட்டைகளை மட்டுமே சத்துணவு திட்டத்திற்கு சப்ளை செய்து வருகிறோம். அதில் சேதம் அடைந்த முட்டை வழங்கப்படுவதாக தகவல் கூறினால், உடனடியாக மாற்றிக் கொடுத்து விடுகிறோம்.
ஈரானில் போர் சூழல் காரணமாக, வெளிநாட்டிற்கான முட்டை ஏற்றுமதி, 10 சதவீதம் தான் நடைபெறுகிறது. நாமக்கல் மண்டலத்தில் இருந்து, நாள் ஒன்றுக்கு, ஒரு கோடி முட்டைகள் வெளிநாடுகளுக்கு ஏற்றுமதி செய்யப்பட்ட நிலையில், தற்போது, 10 லட்சம் முட்டைகள் மட்டுமே அனுப்பப்படுகிறது.
மாநிலத்தில் உள்ள அனைத்து கோழிப்பண்ணைகளும் பதிவு செய்து கொள்ள வேண்டும். அப்போதுதான், எவ்வளவு மூலப்பொருட்கள் தேவை, எவ்வளவு முட்டை உற்பத்தி ஆகிறது, எவ்வளவு வேலைவாய்ப்பு உள்ளது என தெரிந்து கொள்ள முடியும்.
தொழில் குறித்த முழுமையான புள்ளி விபரம் கிடைத்தால்தான் அடுத்தக்கட்டத்திற்கு செல்ல முடியும். மேலும், மூலப்பொருட்கள் தேவைகள் அதிகமாக இருந்தால் இறக்குமதி செய்யப்படும். முட்டையில் மட்டும் தான் உற்பத்தி செய்பவர்களே, விலையை நிர்ணயம் செய்யும் வாய்ப்பு உள்ளது. விவசாயிகளுக்கு விலை நிர்ணயம் செய்ய அந்த வாய்ப்பில்லை.
சத்துணவு டெண்டருக்காகத்தான், மார்க்கெட்டில் முட்டை கொள்முதல் விலை உயர்த்துவதாக கூறுவது தவறு. தேசிய முட்டை ஒருங்கிணைப்பு குழு தான் முட்டை கொள்முதல் விலையை நிர்ணயம் செய்கிறது. முட்டை விலை உயர்வு மட்டும் தான் பேசப்படுகிறது அதன் மூலப்பொருட்களின் விலை உயர்ந்து, முட்டையின் உற்பத்தி செலவு அதிகரித்துக்கொண்டே செல்கிறது என்பதையும் கணக்கில் கொள்ள வேண்டும் என்று கூறினார்.
