கால்நடை மருத்துவ ஆம்புலன்ஸ் சேவைக்கு கால்நடை மருத்துவர், உதவியாளர் மற்றும் டிரைவர் பணியிடங்களுக்கு, நாளை நாமக்கல்லில் நேரடி வேலை வாய்ப்பு முகாம் நடைபெறுகிறது.
1962 சேவை என்பது கட்டணமில்லா கால்நடை மருத்துவ அவசர ஆம்புலன்ஸ் சேவையாகும். இச்சேவை கால்நடைகளுக்கு முற்றிலும் இலவசமாக வழங்கப்படுகிறது. தமிழ்நாடு அரசு, கால்நடை பராமரிப்புத்துறையின் கீழ், அவசரகால கால்நடை மருத்துவ சேவைகளை வழங்குவதற்காக தனியார் நிறுவனத்துடன் இணைந்து இச்சேவையை செயல்படுத்தி வருகிறது.
1962 ஆம்புலன்ஸ் சேவைக்கான கால்நடை மருத்துவர், உதவியாளர் மற்றும் டிரைவர் பணியிடங்களுக்கான நேரடி வேலைவாய்ப்பு முகாம், நாளை 18ம் தேதி சனிக்கிழமை காலை, நாமக்கல் திருச்சி ரோட்டில் பழைய கோர்ட் வளாகத்தில் நடைபெற உள்ளது. தேர்வு செய்யப்படுபவர்கள் தமிழ்நாட்டின் அனைத்து மாவட்டங்களிலும் தேவைக்கேற்ப நியமனம் செய்யப்படும்.
கால்நடை மருத்துவர் பணிக்கான அடிப்படை தகுதிகள்:
பி.வி.எஸ்சி கால்நடை மருத்துவப் பட்டம் பெற்றிருக்க வேண்டும். நேர்முகத் தேர்வு நடைபெறும் நாளன்று 23 வயதுக்கு மேல் இருக்க வேண்டும். ஆண் மற்றும் பெண் புதிய பட்டதாரிகள் மற்றும் அனுபவமுள்ளவர்கள் விண்ணப்பிக்கலாம். மாத சம்பளம் ரூ. 50 ஆயிரம் வழங்கப்படும்.
டிரைவர் பணிக்கான தகுதிகள்:
10 ஆம் வகுப்பு தேர்ச்சி பெற்ற ஆண்கள் விண்ணப்பிக்கலாம். 24 வயதுக்கு மேல் 35 வயதுக்கு மிகாமல் இருக்க வேண்டும். உயரம் : குறைந்தபட்சம் 162.5 செ.மீ. இருக்க வேண்டும். லைட் டிரைவிங் லைசென்ஸ் பெற்று குறைந்தபட்சம் 1 ஆண்டு நிறைவு பெற்றிருக்க வேண்டும். மாத சம்பளம் ரூ. 17,995 வழங்கப்படும்.
உதவியாளர் பணிக்கான தகுதிகள்: 12 ஆம் வகுப்பு தேர்ச்சி பெற்ற ஆண்கள் மட்டும். 19 வயதுக்கு மேல் 30 வயதுக்கு மிகாமல் இருக்க வேண்டும். மாத சம்பளம் ரூ. 17,356 வழங்கப்படும்.
