நாமக்கல் மண்டலத்தில் முட்டை விலை தொடர்ந்து சரிவடைந்து வருகிறது. இன்று மீண்டும் 30 பைசா சரிவடைந்து ஒரு முட்டை விலை ரூ. 5.40 ஆனது.
நாமக்கல் மண்டலத்தில் முட்டை பண்ணை கொள்முதல் விலை படிப்படியாக உயர்ந்து, கடந்த ஜூலை 18ம் தேதி உச்சபட்ச விலையாக ஒரு முட்டை ரூ. 6.80 ஆனது. கடந்த 24ம் தேதி ஒரு முட்டை விலை 30 பைசா குறைந்து ரூ. 6.50 ஆனது.
பின்னர் மீண்டும் 20 பைசா குறைந்து 6.30 ஆனது. கடந்த 27ம் தேதி மேலும் 30 பைசா குறைந்து ரூ. 6 ஆனது. 31ம் தேதி மீண்டும் 30 பைசா குறைந்து ரூ. 5.70 ஆனது.
இந்த நிலையில் இன்று மாலை, என்இசிசி நாமக்கல் மண்டல தலைவர் சிங்கராஜ் தலைமையில் நடைபெற்ற கூட்டத்தில், முட்டை விலை மேலும் 30 பைசா குறைக்கப்பட்டு ஒரு முட்டையின் பண்ணைக்கொள்முதல் விலை ரூ. 5.40 ஆக ஆக நிர்ணயிக்கப்பட்டது.
ஒரு முட்டைக்கு 14 நாட்களில் ரூ. 1.40 பைசா சரிவடைந்துள்ளது. இதனால் தினசரி சுமார் 6 கோடி முட்டைகள் உற்பத்தியாகும் நாமக்கல் மண்டலத்தில் கோழிப்பண்ணை தொழிலில் நாள் ஒன்றுக்கு ரூ. 8.40 கோடி இழப்பு ஏற்பட்டு வருகிறது.
முட்டை விலை தொடர் சரிவால் பண்ணையாளர்கள் கடுமையாக பாதிக்கப்பட்டுள்ளனர்.
