நாமக்கல் மாநகராட்சி பகுதியில் உள்ள வீடுகள், கட்டிடங்கள், பட்டறைகள் உள்ளிட்ட பகுதிகளில், டெங்கு காய்ச்சல் பரப்பும் கொசுப்புழுக்கள் கண்டறியப்பட்டால், சம்மந்தப்பட்ட உரிமையாளருக்கு ரூ. 1 லட்சம் வரை அபராதம் விதிக்கப்படும் என ஆணையர் எச்சரித்துள்ளார்.
நாமக்கல் மாநகராட்சி 13-வது வார்டு மஜித்தெரு, பாவடி தெரு மற்றும் செல்லப்பா காலனி பகுதிகளில் கொசுப்புழு தடுப்பு பணி நடைபெற்றது. இதனை மாநகராட்சி ஆணையர் செல்வ பாலாஜி ஆய்வு செய்தார். அப்போது டெங்கு தடுப்பு பணியில் ஈடுபட்டுள்ள பணியாளர்களிடம் அனைத்து வீடுகளிலும் கொசுப்புழு உள்ளதா என கண்டறிந்து தடுப்பு நடவடிக்கைகள் மேற்கொள்ள வேண்டும் என அறிவுறுத்தினார்.
மேலும், டெங்கு காய்ச்சலை பரப்பும் ஏடிஸ் கொசுக்கள், தேங்கியுள்ள சுத்தமான நீரில் உற்பத்தியாகின்றன. எனவே, வீடு மற்றும் சுற்றுப்புறங்களில் உள்ள தேவையற்ற தண்ணீர் தேக்கங்கள், பழைய டயர்கள், தேங்காய்ச் சிரட்டைகள், உடைந்த பாத்திரங்கள் மற்றும் தண்ணீர் தேங்கக்கூடிய பொருட்களை உடனடியாக அகற்ற வேண்டும்.
தண்ணீர் சேமித்து வைத்துள்ள பாத்திரங்கள், தொட்டிகள் உள்ளிட்டவற்றை காற்று புகாத வகையில் மூடி வைக்க வேண்டும். வாரம் ஒருமுறை சுத்தம் செய்ய வேண்டும். உங்கள் வீட்டைச் சுற்றி தேங்கிய நீர் உள்ளதா என கண்டறிந்து அகற்ற வேண்டும்.
காய்ச்சல், தலைவலி, உடல்வலி, கண்களுக்குப் பின்புறம் வலி போன்ற அறிகுறிகள் இருந்தால் அலட்சியம் செய்யாமல் உடனடியாக அருகிலுள்ள அரசு மருத்துவமனையை அணுக வேண்டும் என பொதுமக்களை வலியுறுத்தினார்.
மேலும், டெங்கு காய்ச்சல் பரப்பும் கொசுப்புழுக்கள் கண்டறியப்படும் வீடுகள், கட்டிடங்கள், பட்டறைகள், பழைய பொருட்கள் விற்பனை செய்யும் கடைகள் போன்றவற்றின் உரிமையாளர்களுக்கு ரூ. 1 லட்சம் வரை அபராதம் விதிக்கப்படும் என எச்சரித்தார்.
இந்த ஆய்வில் மாநகர நல அலுவலர் கஸ்தூரி பாய், சுகாதார அலுவலர் திருமூர்த்தி, துப்புரவு ஆய்வாளர்கள் பாஸ்கர், செல்வகுமார் உள்பட பலர் கலந்து கொண்டனர்.
