பிஃபா உலகக் கோப்பை கால்பந்து திருவிழாவின் இறுதிப் போட்டிக்கு முந்தைய நாள், மெக்சிகோவின் புகழ்பெற்ற குவாடலஹாரா நகரில் காதலும் கால்பந்தும் கைகோர்த்த ஒரு விசித்திரமான கொண்டாட்டம் அரங்கேறியுள்ளது.
உலகக் கோப்பை ஃபேன் ஃபெஸ்ட் கொண்டாட்டக் களத்தில், ஒரே நேரத்தில் 750-க்கும் மேற்பட்ட ஜோடிகள் கலந்துகொண்ட பிரம்மாண்ட கூட்டுத் திருமணம் கோலாகலமாக நடைபெற்றது.
கால்பந்து ரசிகர்களின் நீண்ட கால எதிர்பார்ப்பான 2026ம் ஆண்டு பிஃபா உலகக் கோப்பை கால்பந்து போட்டிகள் விறுவிறுப்பாக நடைபெற்றது. இத்தொடரின் ஒரு பகுதியாக, மெக்சிகோவின் புகழ்பெற்ற குவாடலஹாரா நகரில் விளையாட்டையும் தாண்டி, நெகிழ்ச்சியூட்டும் ஒரு வரலாற்று நிகழ்வு அரங்கேறியுள்ளது.
உலகக் கோப்பைக்காக அமைக்கப்பட்ட அதிகாரப்பூர்வ ரசிகர் கொண்டாட்டத் திடலில் ஒரே நேரத்தில் 725 ஜோடிகளுக்குப் பிரம்மாண்டமான முறையில் கூட்டுத் திருமணம் நடத்தி வைக்கப்பட்டுள்ளது.
குவாடலஹாராவின் மையப்பகுதியில் அமைந்துள்ள வரலாற்றுச் சிறப்புமிக்க ‘பிளாசா லிபரேசியன்’ மைதானத்தில் அமைக்கப்பட்டிருந்த பிஃபா ஃபேன் சோன் திடலில் இந்த வரலாற்றுச் சிறப்புமிக்க பொது சிவில் திருமணம் நடைபெற்றது.
கால்பந்து ஜுரம் உச்சத்தில் இருக்கும் வேளையில், தங்களின் குடும்ப வாழ்வின் புதிய அத்தியாயத்தைக் கால்பந்து கொண்டாட்டத்துடன் இணைக்க விரும்பிய நூற்றுக்கணக்கான ரசிகர்கள் இதில் ஜோடியாகக் கலந்துகொண்டனர்.
இப்படி ஒரு கூட்டுத் திருமணம் நடத்தப்படுவது ஃபிஃபா உலகக் கோப்பை வரலாற்றிலேயே இதுவே முதல் முறையாகும். கால்பந்து உலகக் கோப்பையின் உற்சாகமான பின்னணி இசையோடு, பாரம்பரிய மெக்சிகன் ‘மரியாச்சி’ இசைக் கலைஞர்களின் வயலின் மற்றும் ட்ரம்பெட் இசைக் கச்சேரியுடன் இந்தத் திருமண விழா கோலாகலமாகத் தொடங்கியது.
தங்களின் குடும்பத்தினரின் முன்னிலையில், 725 ஜோடிகளும் ஒரே குரலில் “நான் ஏற்றுக்கொள்கிறேன்” எனக்கூறி தங்களின் வாழ்நாள் துணையைத் தேர்ந்தெடுத்தனர்.
நாட்டின் சட்டப்பூர்வ அங்கீகாரத்துடன் தங்களது திருமண வாழ்க்கையைத் தொடங்க விரும்பிய இந்த ஜோடிகளுக்கு, குவாடலஹாரா நகர நிர்வாகம் ஒரு இன்ப அதிர்ச்சியை அளித்தது. இந்த முழுத் திருமணப் பதிவு மற்றும் சான்றிதழ் வழங்கும் நடைமுறைகள் அனைத்தும் ஜோடிகளுக்கு முற்றிலும் இலவசமாகச் செய்து தரப்பட்டன.
இதன் மூலம் ஒரு ஜோடிக்குத் தலா 2,000 மெக்சிகன் பெசோ வரை கட்டணச் சேமிப்பு கிடைத்துள்ளது குறிப்பிடத்தக்கது. இந்தச் சலுகை மற்றும் அரிய வாய்ப்பு, எளிய பின்னணியைக் கொண்ட பல இளம் ஜோடிகளுக்குத் தங்களின் மணவாழ்க்கையைத் தடையின்றித் தொடங்கப் பெரும் உதவியாக இருந்தது.
கால்பந்து உலகக் கோப்பைத் திருவிழா என்பது வெறும் கோப்பைகளுக்கான விளையாட்டு மட்டுமல்ல, அது உலக நாடுகளின் கலாச்சாரம், காதல், குடும்பம் மற்றும் சமூக ஒற்றுமையை ஒன்றிணைக்கும் ஒரு மாபெரும் திருவிழா என்பதை மெக்சிகோவின் இந்த “உலகக் கோப்பைத் திருமணம்” உலகிற்குப் பறைசாற்றியுள்ளது.
பொதுவாக உலகக் கோப்பை போட்டிகளின் போது ரசிகர்கள் வெற்றிக் கொண்டாட்டங்களில் மட்டுமே ஈடுபடுவார்கள். ஆனால், மெக்சிகோ மக்கள் ஒரு படி மேலே சென்று தங்களின் குடும்ப வாழ்வின் சட்டப்பூர்வமான இணைப்பைக் கால்பந்து திருவிழாவோடு கொண்டாடியுள்ளது உலக அளவில் கவனத்தை ஈர்த்துள்ளது.
