சென்னையில் கோயம்பேட்டிலிருந்து நேற்றிரவு புறப்பட்ட ஆம்னிப் பேருந்து ஒன்று, இன்று காலை 6.30 மணியளவில் சேலம்-கோவை தேசிய நெடுஞ்சாலையில் சங்கரி அருகே உள்ள கலியனூர் என்ற இடத்தில் பேருந்து வந்துகொண்டிருந்தது.
அப்போது, முதியவர் ஒருவர் மோட்டார் சைக்கிளில் சாலையைக் கடக்க முயன்றார். இதனை கவனித்த ஆம்னி பேருந்து டிரைவர் பைக் மீது மோதாமல் இருக்க, திடீரென பிரேக் போட்டார். ஆனால், மொபட் மீது பேருந்து மோதி சாலையோரம் கவிழ்ந்து விபத்துக்குள்ளானது.
இதில், மோட்டார் சைக்கிளில் சென்றவர், சங்கரி, சின்னகவுண்டனூர் அருகே உள்ள வீரபாண்டியர் நகரில் வசிக்கும் பி.பெரியசாமி, 60, பலத்த காயமடைந்து சம்பவ இடத்திலேயே உயிரிழந்தார்.
சிறிது நேரத்தில் பேருந்து கவிழ்ந்ததையடுத்து, அப்பகுதி மக்கள் மற்றும் பயணிகள் உதவியுடன் அதிலிருந்து பயணிகள் அனைவரையும் வெளியேற்றினர். இந்த விபத்தில், பி.ஜெஃபின், தசரதன், ரோகினி பிரியா, சிராஜ்தீன் ஆகிய நான்கு பயணிகளுக்கு காயம் ஏற்பட்டது. ஆனால் சில நிமிடங்களில் பெட்ரோல் டேங்கில் ஏற்பட்ட கசிவு காரணமாக பேருந்து தீப்பிடித்து எரிந்தது.
இதுகுறித்து தகவல் அறிந்த சங்கரி துணை போலீஸ் சூப்பிரண்டு (டிஎஸ்பி) எஸ்.ராஜா மற்றும் போலீசார் சம்பவ இடத்திற்கு விரைந்து வந்து தேசிய நெடுஞ்சாலையில் போக்குவரத்தை தடுத்து நிறுத்தினர். சங்கரி தீயணைப்பு மற்றும் மீட்புப் பணிகள் துறையினர் 30 நிமிடங்களில் தீயை அணைத்தனர். ஆனால் அதற்குள் பேருந்து முழுவதும் எரிந்து நாசமானது.
உயிரிழந்த பெரியசாமி அப்பகுதியில் உள்ள லாரி பட்டறையில் காவலாளியாக பணியாற்றி வந்தார். சங்கரி போலீஸார், சடலத்தை பிரேதப் பரிசோதனைக்காக சேலம் அரசு மருத்துவமனைக்கு அனுப்பி வைத்து வழக்குப் பதிவு செய்தனர். காயமடைந்தவர்கள் சங்கரி அரசு மருத்துவமனையில் அனுமதிக்கப்பட்டுள்ளனர்.
விபத்து காரணமாக தேசிய நெடுஞ்சாலையில் 40 நிமிடங்களுக்கு மேல் தீ அணைக்கும் வரை வாகன போக்குவரத்து பாதிக்கப்பட்டது.
