புதுக்கோட்டை நேரு யுவ கேந்திரா சார்பில் 9 வது சர்வதேச யோகா தின பயிற்சி நடைபெற்றது
சர்வதேச யோகா தினத்தை முன்னிட்டு 21.06.2023 அன்று புதுக்கோட்டை நேரு யுவ கேந்திரா, தமிழ்நாடு விளையாட்டு மேம்பாட்டு ஆணையம், ஆத்மா யோகா மையம், புதுக்கோட்டை சென்ட்ரல் ஜே.சி.ஐ மற்றும் புத்தாஸ் இளையோர் நலன் விளையாட்டு மேம்பாட்டு நிறுவனம் சார்பில் யோகா பயிற்சி மற்றும் மரக்கன்றுகள் நடும் விழா ஆகிய நிகழ்ச்சிகள் முத்தமிழறிஞர் டாக்டர் கலைஞர் கருணாநிதி விளையாட்டரங்க வளாகத்தில் நடைபெற்றறது.
நிகழ்ச்சிக்கு நேரு யுவ கேந்திரா மாவட்ட இளையோர் அலுவலர் ஜோயல் பிரபாகர் தலைமை வகித்தார். மாவட்ட விளையாட்டு மற்றும் இளைஞர்நலன் அலுவலர் செந்தில்குமார் முன்னிலை வகித்தார்.
ஆத்மா யோகா மைய நிறுவனர் யோகா பாண்டியன் மற்றும் புவனேஸ்வரி பாண்டியன் ஆகியோர் யோகா பயிற்சி அளித்தனர். நிகழ்ச்சியில் மாணவ மாணவியருடன் டாக்டர் ராமமூர்த்தி, மரம் ராஜா, தமிழ்நாடு அறிவியல் இயக்க மாவட்ட தலைவர் எம்.வீரமுத்து.
நேரு யுவ கேந்திரா திட்ட உதவி அலுவலர் நமச்சிவாயம், சேது கார்த்திகேயன், நடை பயிற்சியாளர் சங்க நிர்வாகிகள் மத்தியாஸ், அரவிந்த் போன்ற பல்வேறு சமூக நல அமைப்புகளைச் சார்ந்த சுமார் 150 பேர் கலந்து கொண்டு பயிற்சி பெற்றனர்.
மேலும், நிகழ்ச்சியில் 9 வது சர்வதேச யோகா தினத்தை நினைவு கூறும் வகையில் மரம் அறக்கட்டளை சார்பில் விளையாட்டரங்க வளாகத்தில் மரக்கன்றுகள் நடப்பட்டன.
