தக்காளியின் விலையை குறைக்க விவசாய விளைபொருட்க ளுக்கான சாலை சுங்க வரியை ரத்து செய்யலாம் என்று தமிழ்நாடு வணிகர் சங்கங்களின் கூட்டமைப்பு தலைவர் ஏ.எம். விக்ரமராஜா கூறியுள்ளார்.
புதுக்கோட்டையில் வெள்ளிக்கிழமை செய்தியாளர்களிடம் பேசிய விக்கிரமராஜா, கர்நாடகா, ஆந்திரா உள்ளிட்ட மாநிலங்களில் பெய்து வரும் மழையால் தக்காளி வரத்து குறைந்ததால், சமீபகாலமாக தக்காளி விலை உயர்ந்துள்ளது. விவசாய விளைபொருட்கள் மீதான சுங்கசாவடி கட்டணத்தை ரத்து செய்வதன் மூலம் தக்காளி விலையை அரசு உடனடியாக குறைக்க முடியும் என்றார்.
தற்போது தக்காளி விலை கிலோ ரூ.80 ஆக உள்ளது. சுங்கக்கட்டணத்தை ரத்து செய்தால், கிலோ ரூ.60 வரை விலை குறைய வாய்ப்புள்ளது.
மேலும், தக்காளி விலை உயர்வு பிரச்னைக்கு அரசு நிரந்தர தீர்வு காண வேண்டும் என்றார். விவசாயத் துறையினர் தக்காளியை நல்ல விளைச்சலின் போது கொள்முதல் செய்து, தக்காளி பொடி தயாரித்து, பற்றாக்குறையின் போது விற்பனை செய்யலாம் என அவர் யோசனை தெரிவித்தார். இது ஆண்டு முழுவதும் தக்காளியின் விலையை சீராக வைத்திருக்க உதவும்.
ஜிஎஸ்டி வருவாய் ரூ.1 லட்சம் கோடியைத் தாண்டியபோது ஜிஎஸ்டி வரியைக் குறைப்பதாக மத்திய அரசு உறுதியளித் தது. வணிகர்கள் மற்றும் நுகர்வோர் ஆகிய இருபாலருக்கும் பயனளிக்கும் என்பதால், அரசாங்கம் இப்போது ஜிஎஸ்டி விகிதங்களைக் குறைக்க முன்வர வேண்டும் .வணிகர்களுக்கு ஜிஎஸ்டி வரிவிதிப்பைக் குறைத்தால், அதன் மூலம் மக்களுக்கு கிடைக்கும் பொருட்களின் விலையும் குறையும்
வணிகர்களை விசாரிக்க அமலாக்கத் துறையை அனுமதிக்கும் சட்டத் திருத்தம் கவலையளிக்கிறது. இது தவறான நடைமுறை. இது வணிகர்களை துன்புறுத்தவே பயன்படுத்தப்படும்.
காரணம் இல்லாமல் தொழிலதிபர்களை விசாரிக்கும் அதிகாரத்தை அமலாக்கத் துறைக்கு வழங்கக் கூடாது. இது தொடர்பாக மத்திய நிதியமைச்சர் நிர்மலா சீதாராமை சந்திக்க நேரம் கேட்டு, நாடு முழுவதும் உள்ள வணிகர் அமைப்பினர் சந்திக்கத் திட்டமிட்டிருக்கிறோம்.
அனைத்து அரசாங்கங்களும் உள்ளூர் வணிகங்களைப் பாதுகாப்பதாகக் கூறுகின்றன, ஆனால் அவை வெளிநாட்டு நிறுவனங்களையும் அழைக்கின்றன. இது இரட்டை நிலை என்றும், இதனால் பல சிறு தொழில்கள் மூடப்படும் நிலை ஏற்படும். வெளிநாட்டுப் போட்டியிலிருந்து உள்ளூர் தொழில்களை அரசு பாதுகாக்க வேண்டும் என்றார் விக்கிரமராஜா.
