தவெக தலைவரும் நடிகருமான விஜய், சென்னையில் ராணுவ அதிகாரிகளின் குடும்பத்தினரை சந்தித்து பேசிய சம்பவம் பலரின் கவனத்தைப் பெற்றுள்ளது.
தவெக சார்பில் விக்கிரவாண்டியில் கட்சியின் முதல் மாநில மாநாடு பிரமாண்டமாக நடத்தி முடிக்கப்பட்டது. இதையடுத்து மீண்டும் நடிப்பதற்கு ஆயத்தமாகி வருகிறார்.
இயக்குநர் ஹெச்.வினோத் இயக்கத்தில் அரசியல் பிரவேசத்துக்குப்பின்னர் நடிக்கும் கடைசி படத்தில் விஜய் நடிக்கவுள்ளார். அதற்கான படப்பிடிப்புகளில் கலந்து கொண்டுவருகிறார். பையனூரில் கடந்த 4ம் தேதி முதல் நடந்து வரும் இந்த படப்பிடிப்பில் பாபி தியோல் உள்ளிட்டோர் நடித்து வருவதாக தெரியவந்துள்ளது.
இந்நிலையில் சென்னை பரங்கிமலையில் உள்ள ராணுவ அதிகாரிகள் பயிற்சி மையத்தில் நடந்த நிகழ்ச்சி ஒன்றில் இயக்குநர் ஹெச்.வினோத்துடன் நடிகர் விஜய்யும் கலந்து கொண்டார்.
அப்போது ராணுவ அதிகாரிகள் மற்றும் அவர்களின் குடும்பத்தினரை சந்தித்த விஜய் அவர்களுடன் கலகலப்பாக பேசி மகிழ்ந்தார். அண்மையில் சிவகார்த்திகேயன் நடிப்பில் வெளியான மேஜர் முகுந்த் வரதராஜனின் வாழ்க்கை வரலாறு படமான அமரன் ராணுவ அதிகாரிகள் மத்தியில் சிறந்த வரவேற்பை பெற்றுள்ளது.
இந்நிலையில் விஜய் ராணுவ அதிகாரிகளை சந்தித்து பேசியுள்ளது அவர்களை மேலும் மகிழ்ச்சியில் ஆழ்த்தியுள்ளது. அதேவேளையில் விஜய் ராணுவ அதிகாரிகளை சந்தித்த சம்பவம் பலரது கவனத்தைப் பெற்றுள்ளது.
