நாமக்கல்:
நாமக்கல்லில் நடைபெற்ற குடியரசு தின விழாவில் கலெக்டர் உமா தேசியக் கொடியை ஏற்றி வைத்து, பயனாளிகளுக்கு ரூ. 1.81 கோடி மதிப்பிலான நலத்திட்ட உதவிகளை வழங்கினார்.
நாமக்கல் மாவட்ட நிர்வாகத்தின் சார்பில், மாவட்ட விளையாட்டு மைதானத்தில் குடியரசு தின விழா நடைபெற்றது. கலெக்டர் உமா தேசியக் கொடியியை ஏற்றி வைத்து மரியாதை செலுத்தினார். தொடர்ந்து, திறந்த ஜீப்பில் சென்று போலீசாரின் அணிவகுப்பு மரியாதையை ஏற்றுக் கொண்டார்.
குடியரசு தின விழாவை கொண்டாடும் வகையில் கலெக்டர் உமா, போலீஸ் எஸ்.பி. ராஜேஷ்கண்ணன் ஆகியோர் வெண் புறாக்களையும், வண்ண பலூன்களையும் வானில் பறக்க விட்டனர். பின்னர், சுதந்திர போராட்ட வீரர்களின் தியாகத்தை போற்றும் வகையிலும், அவர்களது வாரிசுதாரர்களை சிறப்பு செய்யும் வகையிலும், அவர்களுக்கு கதர் ஆடை அணிவித்து கலெக்டர் பரிசுகளை வழங்கினார். சிறந்த முறையில் அணிவகுப்பு நிகழ்ச்சியை நடத்திய போலீசார் மற்றும் ஊர் காவல் படையினரை பாராட்டி கலெக்டர் பரிசு வழங்கினார்.
மாவட்ட அளவில், சிறப்பாக பணியாற்றிய 40 போலீசாருக்கு முதலமைச்சர் பதக்கங்களையும், 34 போலீஸ் அலுவலர்களுக்கு பாராட்டு சான்றிதழ்களையும் கலெக்டர் வழங்கினார்.
மாவட்டத்தில் சிறப்பாக பணியாற்றிய 307 அரசுத் துறை அலுவலர்கள் மற்றும் பணியாளர்களுக்கு நற்சான்றிதழ்களை வழங்கினார். தொடர்ந்து மாற்றுத்திறனாளிகள் நலத்துறை, வருவாய்த்துறை, வேளாண்மைத்துறை, கூட்டுறவுத்துறை, தோட்டக்கலைத்துறை உள்ளிட்ட பல்வேறு துறைகளில் சார்பில் மொத்தம் 23 பயனாளிகளுக்கு ரூ. 1.81 கோடி மதிப்பிலான நலத்திட்ட உதவிகளை கலெக்டர் வழங்கினார்.
ஏற்கனவே நடைபெற்ற காந்தி மற்றும் நேரு பிறந்த நாள் போட்டிகளில் வெற்றிபெற்ற 34 மாணவ மாணவிகளுக்கு ரூ. 1.80 லட்சம் மதிப்பில் பரிசுகளை கலெக்டர் வழங்கினார். ஆதி திராவிடர் நலத்துறையின் கீழ் செயல்படும் பள்ளிகளில் சிறப்பாக பணியாற்றி, மாணவர்களை 100 சதவீதம் தேர்ச்சிபெற வைத்த 13 ஆசிரியர்களுக்கு பாராட்டு சான்றிதழ் வழங்கப்பட்டது.
மகளிர் திட்டத்தின் சார்பில் 9 சமுதாய அமைப்புகளுக்கு மணிமேகலை விருதினை கலெக்டர் உமா வழங்கினார். தொடர்ந்து 6 பள்ளிகளைச் சேர்ந்த 713 மாணவ மாணவிகள் கலந்துகொண்ட வண்ணமிகு கலை நிகழ்ச்சிகள் நடைபெற்றன. நாமக்கல் போலீஸ் எஸ்.பி. ராஜேஷ்கண்ணன், டிஆர்ஓ சுமன் உள்ளிட்ட பல்வேறு துறை அதிகாரிகள் மற்றும் திரளான பொதுமக்கள் விழாவில் கலந்துகொண்டனர்.
