நாமக்கல் :
நாமக்கல் மாவட்டத்தில், 26ம் தேதி மற்றும் 27ம் தேதி ஆகிய 2 நாட்கள் கனமழை பெய்ய வாய்ப்பு உள்ளது, காற்றின் வேகம் அதிகரித்து காணப்படும் என வானிலை ஆலோசனை மையம் தெரிவித்துள்ளது.
இது குறித்து நாமக்கல் கால்நடை மருத்துவக்கல்லூரி வானிலை ஆய்வு மையம் வெளியிட்டுள்ள, வானிலை முன் அறிவிப்பில் கூறியுள்ளதாவது:
நாமக்கல் மாவட்டத்தில், கடந்த 2 நாட்களாக சில இடங்களில் லேசான மழை பெய்துள்ளது. இதனால் பகல் மற்றும் இரவு நேர வெப்பநிலை குறைந்துள்ளது. நாளை 25ம் தேதி முதல் வரும் 28ம் தேதி தேதி வரை 4 நாட்கள், அதிகபட்ச பகல்நேர வெப்ப நிலை 31 முதல் 34 டிகிரி செண்டிகிரேட் வரை இருக்கும். குறைந்தபட்ச இரவு நேர வெப்பநிலை 22 டிகிரி முதல் 25 டிகிரி செண்டிகிரேட் வரை இருக்கும். வானம் மோகமூட்டத்துடன் காணப்படும். காற்றின் ஈரப்பதம் 50 முதல் 90 சதவீதம் வரை இருக்கும். காற்றின் வேகம் மேற்கு திசையில் இருந்து மணிக்கு 20 முதல் 28 கி.மீ வேகத்தில் வீசக்கூடும். நாளை ஏப். 25ம் தேதி 2 மி.மீ., 26ம் தேதி 12 மி.மீ., 27ம் தேதி 11 மி.மீ., 28ம் தேதி 2 மி.மீ., வரை மழை பெய்ய வாய்ப்பு உள்ளது.
கோழிப்பண்ணையாளர்களுக்கு: அடிக்கடி மழை விட்டுவிட்டு பெய்வதால், ஈக்கள் இனப்பெருக்கும் அதிகரிக்கும் சூழல் உள்ளது. கோழிப்பண்ணைகளில் ஈக்களின் எண்ணிக்கையை கண்காணித்து கட்டுப்படுத்த நடவடிக்கை எடுக்க வேண்டும். பண்ணைகளில் ஈக்களின் எண்ணிக்கையை கணக்கீடு செய்ய ஸ்பாட் கார்டு முறையை கடைபிடிக்கலாம். இவ்வாறு தெரிவிக்கப்பட்டுள்ளது.
