நாமக்கல்:
நாமக்கல் அரசு மருத்துவக் கல்லூரி ஆஸ்பத்திரியில் பணியாற்றி வந்த ஒப்பந்த தூய்மைப் பணியாளர்கள், 86 பேர் திடீர் பணி நீக்கம் செய்யப்பட்டனர். அவர்களுக்கு மீண்டும் பணி வழங்க வேண்டும் என வலியுறுத்தி, தர்ணா போராட்டத்தில் ஈடுபட்டதால், பரபரப்பு ஏற்பட்டது.
நாமக்கல் அரசு மருத்துவக் கல்லூரி ஆஸ்பத்திரியில், கிறிஸ்டல் என்ற தனியார் நிறுவனம் மூலம், ஒப்பந்த அடிப்படையில் தூய்மை பணியாளர்கள், பாதுகாவலர்கள் என, 200க்கும் மேற்பட்டோர் பணியாற்றி வருகின்றனர்.
கடந்த வாரம் கோரிக்கைகளை வலியுறுத்தி, ஒப்பந்த பணியாளர்கள் திடீர் ஸ்டிரைக்கில் ஈடுபட்டனர். பின்னர் சமரச பேச்சுவார்த்தைக்குப்பின் பணிக்கு திரும்பினர். இந்த நிலையில், அரசு ஆஸ்பத்திரியில் பணியாற்றி வந்த, 86 தூய்மைப்பணியாளர்களை, கிறிஸ்டல் நிறுவனம், திடீரென பணி நீக்கம் செய்தது. இதனால் அதிர்ச்சியடைந்த, 86 பேரும், நாமக்கல் அரசு மருத்துவக் கல்லூரி ஆஸ்பத்திரி வளாகத்தில் அமர்ந்து, தர்ணா போராட்டத்தில் ஈடுபட்டனர்.
இது குறித்து, தூய்மைப் பணியாளர்கள் சிலர் கூறியதாவது:
ஆஸ்பத்திரி துப்புறவு பணிகளுக்கு காண்ட்ராக்ட் எடுத்துள்ள தனியார் நிறுவனம், எங்களுக்கு உரிய சம்பளம் வழங்குவதில்லை. ஒப்பந்தப்படி கூறப்பட்டுள்ள வேலை நேரத்தை விட கூடுதல் நேரம் வேலை செய்ய வேண்டும் என கட்டாயப்படுத்துகின்றனர். தொழிலாளர் வைப்பு நிதி, இ.எஸ்.ஐ., போன்றவை வரவு வைப்பதில்லை, இது குறித்து போராட்டம் நடத்தியதால் தான், எங்களை பணி நீக்கம் செய்துள்ளனர் என அவர்கள் கூறினார்கள்.
இது குறித்து, கிறிஸ்டல் நிர்வாகத்தினர் கூறும்போது, நாமக்கல் அரசு மருத்துவக் கல்லூரி ஆஸ்பத்திரிக்கு, புதிதாக நேர கட்டுப்பாடு விதிக்குமாறு சென்னையில் உள்ள தலைமை அலுவலகம் தெரிவித்துள்ளது. நேர கட்டுப்பாட்டை மதித்து பணியாற்றும் தொழிலாளர்களை மட்டும் பணியில் வைத்துக்கொண்டு மற்றவர்களை நிரந்திரமாக பணிநீக்கம் செய்ய உத்தரவிடப்பட்டுள்ளது.
அதன்படி, தற்போது, 86 பேர் நிரந்தரமாக பணி நீக்கம் செய்யப்பட்டுள்ளனர் என்றனர். தூய்மைப் பணியாளர்கள் திடீரென பணி நீக்கம் செய்யப்பட்டுள்ளதால், நாமக்கல் அரசு மருத்துவக் கல்லூரி ஆஸ்பத்திரியில் தூய்மைப் பணிகள் பாதிக்கும் அபாயம் ஏற்பட்டுள்ளது.
