திருவொற்றியூர் தொகுதியைச் சேர்ந்த மாற்றுத் திறனாளிக ளுக்கான நலத்திட்ட உதவிகள் வழங்கும் விழா சட்டப் பேரவை உறுப்பினர் கே.பி.சங்கர் தலைமையில் திருவொற்றியூர் அரசு ஜெயகோபால் கரோடியா மேல்நிலைப் பள்ளியில் நடைபெற்றது.
இதில் மக்கள் நல்வாழ்வுத் துறை, வருவாய்த் துறை, மாவட்ட வேலைவாய்ப்பு அலுவலகம், பள்ளிக் கல்வித்துறை, மாவட்ட தொழில் மையம், ஆவின், மத்திய கூட்டுறவு வங்கி, தமிழ்நாடு மாநில ஊரக வாழ்வாதார இயக்கம், குழந்தைகள் வளர்ச்சி திட்ட அலுவலகம், முதலமைச்சரின் விரிவான மருத்துவ காப்பீடு திட்டம், தாட்கோ, முன்னோடி வங்கிகளின் மேலாளர்கள், எல்காட், காவல் துறை மற்றும் மாவட்ட மாற்றுத் திறனாளிகள் நல அலுவலகம் உள்ளிட்ட பல்வேறு துறைகளின் சார்பில் வழங்கப்படும் நலத்திட்ட உதவியை பெறுவதற்கான 216 மாற்றுத் திறனாளிகள் கலந்து கொண்டனர்.
இம்முகாமை சென்னை மாவட்ட ஆட்சியர் எஸ். அமிர்தஜோதி தொடங்கி வைத்து மாற்றுத்திறனாளிகளுக்கான தேசிய அடையாள அட்டை, தனித்துவம் வாய்ந்த அடையாள அட்டை, வங்கி கடன் மானியம், ஆவின் உதவி உபகரணங்கள், மாதாந்திர பராமரிப்பு உதவித்தொகை, முதலமைச்சரின் விரிவான மருத்துவ காப்பீடு உள்ளிட்டவைகள் வழங்கினார்.
இந்நிகழ்ச்சியில் வருவாய் கோட்டாட்சியர் ரெங்கராஜன், மாவட்ட மாற்றுத் திறனாளிகள் நல அலுவலர் சீ.குமார், பெற்றோர் ஆசிரியர் சங்க தலைவர் வீ.ராமநாதன், மாமன்ற உறுப்பினர் கே.பி.சொக்கலிங்கம் உள்ளிட்டோர் கலந்து கொண்டனர்.
