அமெரிக்க அதிபர் தேர்தலில் வெற்றி பெற்ற டொனால்டு டிரம்ப் இரண்டாம் முறையாக அதிபராக உள்ளார்.
அமெரிக்க அதிபர் தேர்தலில் வெற்றி பெறுவதற்கு 270 எலக்டோரல் வாக்குகளுக்கும் அதிகமான எண்ணிக்கையை பெற்றிருக்க வேண்டும். தேர்தலில் பதிவான வாக்குகள் எண்ணப்பட்டு வரும் சூழலில், இதுவரை வெளியான முடிவுகளில் குடியரசுக் கட்சி வேட்பாளர் டொனால்ட் டிரம்ப் 267 எலக்டோரல் வாக்குகளைப் பெற்றுள்ளார்.
அவரை எதிர்த்து போட்டியிட்ட ஜனநாயகக் கட்சி வேட்பாளர் கமலா ஹாரிஸ் 224 எலக்டோரல் வாக்குகள் மட்டுமே பெற்று பின்தங்கிய நீலையில் உள்ளார். வாக்குகள் எண்ணப்பட்டு வரும் ஐந்து மாநிலங்களிலும் டிரம்ப் முன்னிலையில் உள்ளதால் அவரது வெற்றி உறுதியாகியுள்ளது.
51 சதவீதத்துக்கும் அதிகமான வாக்குகள் பெற்று வாக்கு சதவீதத்திலும் டிரம்ப் முன்னிலையில் உள்ளார். நெவாடா, அரிசோனா, விஸ்கான்சின் போன்ற சில மாகாணங்களில் மட்டுமே இன்னும் தேர்தல் முடிவுகள் வெளியாகாமல் உள்ளது.
அமெரிக்க அதிபர் தேர்தலில், வெவ்வேறு மாகாணங்களில் இந்திய வம்சாவளியைச் சேர்ந்த 2 பேர் வெற்றி பெற்றுள்ளனர். வடக்கு விர்ஜினியா மாகாணத்தின் 10 ஆவது மாவட்டத்தில் ஜனநாயக கட்சி வேட்பாளரான இந்திய வம்சாவளியை சேர்ந்த சுஹாஸ் சுப்ரமணியம் வெற்றி பெற்றுள்ளார். இவர் ஒபாமா ஆட்சியின் போது, தொழில்நுட்பக் கொள்கை ஆலோசகராக பணியாற்றினார் என்பது குறிப்பிடத்தக்கது.
இதே போன்று, இல்லினாய்ஸ் மாகாணத்திலும் ஜனநாயக கட்சி வேட்பாளரான இந்திய வம்சாவளியை சேர்ந்த ராஜா கிருஷ்ணமூர்த்தி மீண்டும் வெற்றி பெற்றுள்ளார். இவர் தன்னை எதிர்த்து போட்டியிட்ட குடியரசு கட்சி வேட்பாளர் மார்க் ரைசை விட 57.1 சதவீத வாக்குகள் அதிகம் பெற்று வெற்றி பெற்றுள்ளார்.
இதற்கிடையே அமெரிக்க அதிபராகவுள்ள டொனால்டு டிரம்புக்கு பிரதமர் நரேந்திர மோடி வாழ்த்து தெரிவித்துள்ளார். இதுதொடர்பாக எக்ஸ் தளத்தில் பதிவிட்டுள்ள அவர், “வரலாற்றுப்பூர்வமான தேர்தல் வெற்றிக்கு நண்பர் டொனால்டு டிரம்புக்கு வாழ்த்துகள்” என்று பதிவிட்டுள்ளார்.
