சமூக வலைதளங்களில் இன்று 1980-களின் பாணியிலான அடர்ந்த தலைமுடி, ஏவியேட்டர் கண்ணாடிகள், அனலாக் ஃபிலிம் ரகப் படங்கள் மற்றும் பழைய ரெட்ரோ பாணி புகைப்படங்கள் அதிகளவில் பகிரப்பட்டு வருகின்றன. ஆனால், இந்த 80-கள் சார்ந்த கடந்த காலம் உண்மையில் நிகழவே இல்லை; அவை அனைத்தும் நிகழ் காலத்தில் செயற்கை நுண்ணறிவால் உருவாக்கப்பட்டவை.
விளையாட்டாகத் தொடங்கி அரசியலாக மாறியப் போக்கு
ஒரு விண்டேஜ் ரசனைக்காகத் தொடங்கிய இந்த இணையப் போக்கு, மிக விரைவிலேயே அரசியல் களத்தின் தாக்குதல் கருவியாக மாறியது. காங்கிரஸ் மற்றும் பாஜக ஆகிய அரசியல் கட்சிகள் இந்த ஆக்கப்பூர்வ செயற்கை நுண்ணறிவு புகைப்படத் தொழில்நுட்பத்தைப் பயன்படுத்தி அரசியல் பரப்புரைகளையும் விமர்சனங்களையும் உருவாக்கத் தொடங்கின.
முன்னர் ஒரு புகைப்படத்தையோ விளம்பரத்தையோ உருவாக்கத் தேவையாக இருந்த ஒளிப்பதிவாளர்கள், தொலைக்காட்சிக்குழு மற்றும் பெரிய அளவிலான வர்த்தக பட்ஜெட்கள் போன்ற உள்கட்டமைப்புகளை இந்த ஆக்கப்பூர்வ ஏஐ தொழில்நுட்பம் மிகவும் எளிமையாக்கிவிட்டது.
ஃபேஷன் துறை எவ்வாறு ஆசைகளையும் பிம்பங்களையும் உற்பத்தி செய்கிறது என்பதை நாம் புரிந்துகொள்ள வேண்டும். ஒரு பிரச்சாரப் புகைப்படம் ஒரு ஆடையைக் கிளர்ச்சி, ஆடம்பரம் அல்லது பொறுப்பின் அடையாளமாகக் காட்ட முடியும். ஆக்கப்பூர்வ ஏஐ இந்த அணுகுமுறையை மேலும் தீவிரமாக்கியுள்ளது. நாம் விரும்பும் “உண்மைகளைத்” தேவைகேற்ப உடனடியாக உருவாக்கும் பொருளாதாரத்தை நோக்கி நகர்ந்து கொண்டிருக்கிறோம்.
சுற்றுச்சூழல் மற்றும் ஏஐ: ஒப்பீடு
சுற்றுச்சூழல் நிலைத்தன்மை என்பது வெறும் கார்பன் உமிழ்வு அல்லது மறுசுழற்சி மட்டுமல்ல. “நாம் உற்பத்தி செய்வதன் விளைவுகள், உற்பத்தியிலிருந்து பிரியும்போது என்ன நடக்கும்?” என்ற கேள்வியே இதன் மையம்.
ஃபேஷன் துறை இதனைப் பல போராட்டங்களுக்குப் பிறகே கற்றுக்கொண்டது. பல தசாப்தங்களாக மலிவான ஆடைகள் நுகர்வோருக்கு மிக எளிதாகக் கிடைத்தன. ஆனால் அவற்றின் உண்மையான செலவுகளான கழிவு, நீர் விரயம், உமிழ்வு மற்றும் தொழிலாளர் சுரண்டல் போன்றவை மதிப்புச் சங்கிலியில் எங்கோ மறைக்கப்பட்டிருந்தது.
அதேபோன்ற ஒரு புரிதல் AI தொழில்நுட்பத்திற்கும் தேவைப்படுகிறது. செல்போனில் நொடிப் பொழுதில் உருவாகும் செயற்கை படங்கள் கண்ணுக்குப் புலப்படாதவை என்பதால் அவை பாதிப்பற்றவை அல்ல.
அவற்றின் பின்னணியில் ஆற்றல் பயன்பாடு, தரவு, ஒப்புதல், அறிவுசார் சொத்துரிமை, உழைப்பு மற்றும் முதன்மையாக நம்பிக்கை சார்ந்த வினாக்கள் அடங்கியுள்ளன.
காட்சிச் சான்றுகள் மீதான நம்பிக்கை இழப்பு
பல தசாப்தங்களாக புகைப்படங்களுக்கு ஒரு தனித்துவமான அதிகாரம் இருந்தது. அவை மாற்றப்படலாம் அல்லது திட்டமிட்டுப் படம் பிடிக்கப்படலாம், ஆனால் கேமரா உலகத்தில் ஏதோ ஒன்றை எதிர்கொண்டது என்பதே அடிப்படை நம்பிக்கையாக இருந்தது.
ஆனால் செயற்கை நுண்ணறிவு அந்த நம்பிக்கையை உடைக்கிறது. பொய்யானவற்றை நாம் நம்புவது மட்டுமல்ல, உண்மையானவற்றையும் சந்தேகிக்கத் தொடங்குவதே இதன் மிகக் கடுமையான விளைவாகும்.
80-களின் ஆடை அணிந்து இந்த ஏஐ பாடம் நமக்கு வந்துள்ளது பொருத்தமானது. பாணிகள் மீண்டும் வரும், ஆனால் அவை விட்டுச் சென்ற உலகம் மீண்டும் வராது என்பதை ஃபேஷன் துறை அறியும்.
கடந்த காலத்தை உருவாக்கும் ஆற்றலை ஏஐ நமக்கு அளிக்கிறது; அந்த ஆற்றலை நாம் எப்படிப் பயன்படுத்துகிறோம் என்பதுதான் நமது எதிர்காலத்தைத் தீர்மானிக்கும்.
