முன்னாள் அமைச்சரும் விராலிமலை தொகுதி எம்எல்ஏ –வுமான டாக்டர் சி. விஜயபாஸ்கர் புதுக்கோட்டை நகராட்சியின் 16 -ஆவது வார்டில் அதிமுக சார்பில் போட்டியிடும் வேட்பாளர் எஸ்.அப்துல்ரஹ்மான் என்ற எஸ்.ஏ.எஸ். சேட் – ஆதரவாக ஞாயிற்றுக்கிழமை தீவிர வாக்கு சேகரிப்பில் ஈடுபட்டார்.
புதுக்கோட்டை நகராட்சியில் அண்ணா திராவிட முன்னேற்ற கழகத்தின் சார்பில் 16 -ஆவது வார்டில் எஸ்.அப்துல்ரஹ்மான் என்ற எஸ்.ஏ.எஸ். சேட் போட்டியிடுகிறார். இவர் ஏற்கெனவே 2001-06 மற்றும் 2011-16 ஆகிய ஆண்டுகளில் நகர்மன்ற உறுப்பினராகவும் நகர்மன்ற துணைத்தலைவராகவும் பதவி வகித்து வார்டு மக்களின் நன்மதிப்பைப் பெற்றவர்.
தற்போது மூன்றாவது முறையாக அதிமுக சார்பில் களம் காணும் எஸ்.அப்துல்ரஹ்மான் என்ற எஸ்.ஏ.எஸ். சேட் – ஆதரவாக முன்னாள் அமைச்சர் டாக்டர் சி. விஜயபாஸ்கர் பிரசாரம் செய்து வாக்கு சேகரித்தார்.
தெற்கு 2 -ஆம் வீதியிலுள்ள மார்கெட் பகுதியில் இரட்டை இலை சின்னத்துக்கு வாக்கு சேகரித்தார். அதிமுக நிர்வாகிகள் பலர் உடனிருந்தனர்.
16 வது வார்டுக்குள்பட்ட பகுதிகள்: தெற்கு 2, 3, 4 வீதிகள், பழைய அரண்மனை, வடக்கு ராஜவீதி, மேலராஜவீதி, சீதாபதிபிள்ளை யார்கோவில் வீதி, சத்திரம் சந்து, பல்லவன்குளம் வடக்கு சந்து, பல்லவன்குளம் வடிமதகு சந்து, சாந்தநாதசுவாமி கோவில் சந்து, முனிசிபல் ஆபிஸ் சந்து, ஜெயில் மோரி சந்து, ரொட்டிக்கார சந்து, பல்லவன்குளம் வடக்கு சந்து மேல்கரை ஆகிய பகுதிகளில் வீடு வீடாகச்சென்று வாக்குகள் சேகரித்து வருகிறார். இந்த வார்டில் ஆண் வாக்காளர்கள் 1,372, பெண் வாக்காளர்கள் 1,533 உள்பட மொத்தம் 2,905 வாக்காளர்கள் உள்ளனர். நகர்ப்புற உள்ளாட்சித் தேர்தல் பிப் 19 -ஆம் தேதி நடைபெறவுள்ளது.
