ஸ்ரீரங்கம் ரங்கநாதர் கோயில் வைகுண்ட ஏகாதசி பெருவிழாவிற்கு பந்தக்கால் நடப்பட்டது.
பூலோக வைகுண்டம் எனப்படுவதும், 108 வைணவ திருத்தலங்களில் முதன்மையானதுமான திருச்சி ஸ்ரீரங்கம் ரங்கநாதர் கோவிலில் ஆண்டுதோறும் வைகுண்ட ஏகாதசி விழா கோலாகலமாக கொண்டாடப்பட்டு வருகிறது.
இந்த ஆண்டு வைகுண்ட ஏகாதசி பெரு விழா வருகிற டிசம்பர் மாதம் 30-ந்தேதி திருநெடுநதாண்டகத்துடன் தொடங்குகிறது.
அடுத்த ஆண்டு ஜனவரி மாதம் 20-ந்தேதி வரை மொத்தம் 21 நாட்கள் இந்த விழா நடைபெறுகிறது. டிசம்பர் 31-ந்தேதி பகல் பத்து உற்வசம் தொடங்குகிறது.
ஜனவரி 9-ந்தேதி மோகினி அலங்காரமும், 10-ந்தேதி வைகுண்ட ஏகாதசி பெருவிழாவின் சிகர நிகழ்ச்சியான பரமபதவாசல் எனப்படும் சொர்க்கவாசல் திறப்பு நிகழ்ச்சியும் நடைபெறுகிறது. 16-ந்தேதி திருக்கைத்தல சேவையும், 17-ந்தேதி திருமங்கை மன்னன் வேடுபறி நிகழ்ச்சியும், 19-ந்தேதி தீர்த்தவாரியும், 20-ந்தேதி நம்மாழ்வார் மோட்சமும் நடைபெறுகிறது.
இந்த விழாவையொட்டி ரங்கநாதர் கோவிலில் ஆயிரங்கால் மண்டபம் அருகே பந்தக் கால் நடும் நிகழ்ச்சி நேற்று காலை நடைபெற்றது.
நிகழ்ச்சியின் போது ஆயிரங்கால் மண்டபத்தில் கோவில் அர்ச்சகர்கள் வேதங்கள் சொல்ல மேள, நாதஸ்வரங்கள் ஒலிக்க கோவில் யானை ஆண்டாள் ஆயிரங்கால் மண்டபத்திற்கு அருகில் நின்றபடி மரியாதை செலுத்தியது.
அதுசமயம் முகூர்த்த பந்தல் காலில் புனிதநீர் ஊற்றி, சந்தனம், மாவிலை மற்றும் மாலை அணிவிக்கப்பட்டு சிறப்பு பூஜைகள் செய்யப்பட்டன. பின்னர் பந்தக் காலை கோவில் பணியாளர்கள் நட்டனர்.
இதனை தொடர்ந்து ஆயிரங்கால் மண்டபம் அருகே கூடுதல் பந்தக் கால்கள் ஊன்றி திருக்கொட்டகை அமைக்கும் பணி நடைபெறும். விழாவிற்கான ஏற்பாடுகளை கோவில் இணை ஆணையர் மற்றும் கோவில் அலுவலர்கள் , பணியாளர்கள் செய்து வருகின்றனர்.