நாமக்கல்:
நாமக்கல் மாவட்டத்தில் வருகிற 26ம் தேதி ஓய்வூதியர்கள் குறைதீர்க்கும் நாள் கூட்டம் நடைபெறுகிறது.
இது குறித்து நாமக்கல் கலெக்டர் உமா வெளியிட்டுள்ள செய்திக்குறிப்பில் கூறியுள்ளதாவது:
நாமக்கல் மாவட்டத்தில் ஓய்வூதியர் குறைதீர்க்கும் நாள் கூட்டம் வருகிற 26ம் தேதி காலை 10 மணிக்கு கலெக்டர் ஆபீசில் நடைபெறுகிறது. கலெக்டர் உமா தலைமையில் நடைபெறும் கூட்டத்தில், சென்னை, ஓய்வூதிய இயக்குநரக அலுவலர்கள் கலந்துகொள்கின்றனர்.
நாமக்கல் மாவட்டத்தில் உள்ள ஓய்வூதியர்கள் மற்றும் குடும்ப ஓய்வூதியர்கள் தங்களின் ஓய்வூதியம் தொடர்பான குறைகள் ஏதுமிருப்பின் அக்குறைகள் குறித்த விண்ணப்பங்களை தேவையான இணைப்புகளோடு 3 பிரதிகளில் வருகிற 12ம் தேதிக்கு முன்னதாக, மாவட்ட கலெக்டரின் நேர்முக உதவியாளருக்கு (கணக்குகள்) வந்து சேரும்படி அனுப்பி வைக்க வேண்டும்.
கோரிக்கை மனுவில், ஓய்வூதியர்கள் தங்களின் இ-மெயில் முகவரி, செல்போன் நம்பர் முதலிய விபரங்களை குறிப்பிட்டு அனுப்பி வைக்க வேண்டும்.
கோரிக்கை மனுக்கள் அனுப்பிய ஓய்வூதியர்கள் தவறாமல், 26ம் தேதி நடைபெறும் குறைதீர் கூட்டத்தில் கலந்துகொண்டு தங்களது குறைகளை நிவர்த்தி செய்துகொள்ளலாம்.
கலந்து கொள்ள இயலாத ஓய்வூதியர்கள் சார்பாக வேறு யாரேனும் ஒருவர் கலந்து கொண்டு அவர்களது குறைகளை நீக்க முறையீடு செய்யலாம். கடந்த முறை விண்ணப்பம் அளித்து குறைகள் தீர்வு செய்யப்படாமல் இருப்பின் தற்போது மீண்டும் புதிதாக விண்ணப்பம் செய்யலாம்.
இக்குறைதீர் நாள் கூட்டத்திற்கு முன்னதாக 20ம் தேதியன்று காலை 11.30 மணிக்கு நாமக்கல் மாவட்ட கலெக்டரின் நேர்முக உதவியாளர் (கணக்குகள்) முன்பாக நடைபெறும் முன் ஆய்வுக் கூட்டத்தில் துறை அலுவலர்களோடு, நாமக்கல் மாவட்ட ஓய்வூதியர் சங்க பிரதிநிதிகள் மட்டும் கலந்து கொள்ளலாம் என தெரிவிக்கப்பட்டுள்ளது.
