எண்ணும் எழுத்தும் திட்டத்தின் கீழ் அரசு தொடக்கப்பள்ளிகளில் முதுகலை ஆசிரியர்களுக்கு வழங்கப்பட்டுள்ள, வழிகாட்டி ஆசிரியர் பணியை ரத்து செய்ய வேண்டும் என முதுகலைப்பட்டதாரி ஆசிரியர்கள் சங்கம் வேண்டுகோள் விடுத்துள்ளது.
இது குறித்து, நேரடி நியமனம் பெற்ற முதுகலைப் பட்டதாரி ஆசிரியர்கள் சங்க மாநில தலைவர், நாமக்கல் ராமு, தமிழக பள்ளிக்கல்வித்துறை அமைச்சருக்கு அனுப்பியுள்ள மனுவில் கூறியுள்ளதாவது:
தமிழ்நாடு அரசு தொடக்கக் கல்வித்துறையின் கட்டுப்பாட்டில் உள்ள பள்ளிகளில் 1ம் வகுப்பு முதல், 3ம் வகுப்பு வரை எண்ணும் எழுத்தும் திட்டம் செயல்படுத்தப்பட்டு வருகிறது.
இந்த திட்டத்தின் கீழ் அரசு பள்ளிகளில் மதிப்பீடு செய்யவும், களப்பணியாளர்களாக செயல்பட உள்ள பிஎட் கல்லூரி மாணவர்களுக்கு உடனிருந்து வழிகாட்டுதல் வழங்கவும், அரசு பள்ளிகளில் பணிபுரியும் முதுகலை ஆசிரியர்கள் நியமிக்கப்பட்டுள்ளனர்.
முதுகலை ஆசிரியர்களை பொறுத்தவரை பிளஸ் 1 மற்றும் பிளஸ் 2 பொது தேர்வுகளுக்கு மாணவர்களை தயார் செய்யக்கூடிய பெரும் பணியை செய்து வருகிறார்கள். அது மட்டும் இல்லாமல் பள்ளி வேலை நாட்களில் நீட், ஜேஇஇ மற்றும் உயர்கல்வி வழிகாட்டுதல்களுக்கான பயிற்சி வகுப்புகளை முதுகலை ஆசிரியர்கள் நடத்தி வருகின்றனர். அதோடு, ஆன்லைன் மூலம் கல்வித்துறையின் எமிஸ் வெப்சைட்டில் பல்வேறு தகவல்களை பதிவு செய்ய வேண்டிய பணிகள் உள்ளது.
இவ்வாறு மாணவர்களுக்கு கற்றல் கற்பித்தல் பணிகள் தவிர்த்து பல்வேறு பணிகளை முதுகலை ஆசிரியர்கள் செய்து வரக்கூடிய நிலையில், கூடுதலாக தொடக்கக் கல்வித்துறையில் செயல்படுத்தப்பட்டுள்ள எண்ணும் எழுத்தும் திட்டத்தை மதிப்பீடு செய்யவும், களப்பணியாளர்களுக்கு வழிகாட்டுதல் வழங்கவும் முதுகலை ஆசிரியர்களை நியமித்திருப்பது பெரும் அதிர்ச்சிக்கு உள்ளாகி இருக்கிறது.
எனவே அரசு பள்ளிகளில் பிளஸ் 1, பிளஸ் 2 படிக்கும் மாணவர்களின் நலன் கருதி முதுகலை ஆசிரியர்களுக்கு எண்ணும் எழுத்தும் திட்டத்தில் வழங்கப்பட்டுள்ள வழிகாட்டி ஆசிரியர் பணியை உடனடியாக ரத்து செய்ய நடவடிக்கை எடுக்க வேண்டும் என அந்த மனுவில் கூறப்பட்டுள்ளது.
