நாமக்கல் :
நாமக்கல்லில் உள்ள அருள்மிகு அரங்காநாதர் திருக்கோயிலில் வைகுண்ட ஏகாதயை முன்னிட்டு 10ம் தேதி, வெள்ளிக்கிழமை சொர்க்கவாசல் திறக்கப்படுகிறது. அதற்கான ஏற்பாடுகள் தீவிரமாக நடைபெற்று வருகிறது.
ஒரே கல்லினால் உருவான நாமக்கல் மலையின் கிழக்குப்பக்கத்தில் அருள்மிகு அரங்கநாயகி தாயார் உடனுரை அரங்காநாதர் திருக்கோயில் உள்ளது. இந்த கோயில் மலையைக் குடைந்து குடறைக்கோயிலாக உருவாக்கப்பட்டு தொல்பொருள் ஆய்வுத்துறையின் கட்டுப்பாட்டில் உள்ளது.
இந்து சமய அறநிலையத்துறை மூலம் நிர்வகிக்கப்பட்டு வருகிறது. 17ஆம் நூற்றாண்டில் பல்லவ மன்னர்களால் கட்டப்பட்ட இக்கோயில் புராண சிறப்புப் பெற்றதாகும். இங்கு கார்க்கோடகன் என்ற பாம்பின் மீது அனந்த சயனக்கோலத்தில் அரங்கநாதர் பக்தர்களுக்கு அருள்புரிந்து வருகிறார்.
ஒவ்வொரு ஆண்டும் வைகுண்ட ஏகாதசி நாளில் இக்கோயிலில் பரமபத வாசல் எனும் சொர்க்கவாசல் திறக்கப்படும்.
இந்த ஆண்டு வைகுண்ட ஏகாதசியை முன்னிட்டு 10ம் தேதி, வெள்ளிக்கிழமை அதிகாலை 4.15 மணிக்கு கோயில் பட்டாச்சாரியார்கள் சொக்கவாசல் கதவுகளுக்கு சிறப்பு பூஜை செய்வார்கள். பின்னர் ஆகம விதிகளின்படி சொர்க்க வாசல் எனும் பரமபத வாசல் திறக்கப்பட்டு, அதன் வழியாக சாமியின் ஜடாரி எடுத்து வரப்பட்டு சிறப்பு பூஜைகள் நடைபெறும்.
பின்னர் அதிகாலை முதல் இரவு வரை, பக்தர்கள் சொர்க்கவாசல் வழியாகச் சென்று சுவாமியை வழிபாடு செய்ய அனுமதிக்கப்படுவார்கள். சொர்க்கவாசல் வழியாக உற்சவர் வராமல் சுவாமியின் ஜடாரி கொண்டுவருவது இக்கோயிலின் தனிச் சிறப்பாகும்.
விழாவில் கலந்துகொண்டு சுவாமி தரிசனம் செய்ய, ஆயிரக்கணக்கான பக்தர்கள் கோயிலுக்கு வருவார்கள். எனவே பக்தர்கள் சிரமம் இல்லாமல் கோயிலுக்கு வரிசையாக வந்து, சுவாமியை வழிபட்டு செல்வதற்கு ஏதுவாக தடுப்புகள் அமைத்தல் உள்ளிட்ட பணிகள் விறுவிறுப்பாக மேற்கொள்ளப்பட்டு வருகிறது.
பக்தர்கள் எளிதாக கோயிலுக்கு சென்று வர தேவையான பாதுகாப்பு ஏற்பாடுகளை போலீசார் மேற்கொண்டு வருகின்றனர். 10ம் தேதி அதிகாலை முதல், நாமக்கல் மெயின்ரோட்டில் போக்குவரத்து தடை செய்யப்பட்டு, வாகனங்கள் மாற்று வழியில் திருப்பி விடப்படும்.
திருக்கோயில் அறங்காவலர் குழு தலைவர் தென்பாண்டியன் நல்லுசாமி, அறங்காவலர்கள் டாக்டர் மல்லிகா, சீனிவாசன், செல்வ சீராளன், ரமேஷ்பாபு, அறநிலையத்துறை உதவி கமிஷனர் இளையராஜா ஆகியேர் விழாவுக்கான ஏற்பாடுகளை செய்து வருகின்றனர்.
