நாமக்கல்:
நாமக்கல் மற்றும் திருச்செங்கோட்டில் 24ம் தேதி கோட்ட அளவிலான விவசாயிகள் குறைதீர் கூட்டம் நடைபெறுகிறது.
இது குறித்து, நாமக்கல் கலெக்டர் உமா வெளியிட்டுள்ள செய்திக்குறிப்பில் கூறியுள்ளதாவது:
நாமக்கல் மாவட்டத்தில் மாதம்தோறும் வருவாய் கோட்ட அளவிலான விவசாயிகள் குறைதீர்க்கும் நாள் கூட்டம் நடத்தப்பட்டு வருகிறது.
அதையொட்டி, இந்த மாதத்திற்கான, நாமக்கல் வருவாய் கோட்ட அளவிலான விவசாயிகள் குறைதீர் கூட்டம், ஆர்டிஓ தலைமையில் வருகிற 24ம் தேதி வெள்ளிக்கிழமை காலை 11 மணிக்கு, நாமக்கல் ஊராட்சி ஒன்றிய கூட்ட அரங்கில் நடைபெறுகிறது. திருச்செங்கோடு கோட்ட அளவிலான விவசாயிகள் குறைதீர் கூட்டம் ஆர்டிஓ தலைமையில், வருகிற 24ம் தேதி வெள்ளிக்கிழமை காலை 11 மணிக்கு பள்ளிபாளையம் ஊராட்சி ஒன்றிய அலுவலக கூட்ட அரங்கில் நடைபெற உள்ளது.
இக்கூட்டத்தில் விவசாயிகள் மற்றும் விவசாய சங்கப் பிரதிநிதிகள் கலந்துகொண்டு, தங்களது பயிர் சாகுபடிக்குத் தேவையான நவீன தொழில்நுட்பங்கள், வேளாண் இடுபொருள் இருப்பு விவரங்கள், வேளாண்மை உழவர் நலத்துறை மற்றும் இதர துறைகளில் செயல்படுத்தப்பட்டு வரும் மானியத் திட்டங்கள் குறித்து அறிந்து கொள்வதுடன் தங்களது கோரிக்கைகளை தெரிவித்து பயன்பெறலாம் என கலெக்டர் கூறியுள்ளார்.
