காஞ்சிபுரம் மாவட்டம், வாலாஜாபாத் வட்டத்தில் உள்ளது தேவரியம்பாக்கம் கிராமம். இங்குள்ள பெருமாள் கோவிலில் புத்தர் சிலை உள்ளதாக அறிந்த வாலாஜாபாத் வட்டார வரலாற்று ஆய்வு மையத்தின் தலைவர் அஜய்குமார் தலைமையிலான குழுவினர் கள ஆய்வு மேற்கொண்டனர்.
இதைப் பற்றி அவர் கூறியதாவது: அழகிய வெண்மை நிற பளிங்குக் கல்லால் ஆன அமர்ந்த நிலையில் உள்ள புத்தரின் சிலை தேவரியம்பாக்கத்தில் பஜனைக் கோவில் எனப்படும் பெருமாள் கோவிலில் ஓரம் கட்டி வைக்கப்பட்டிருந்த பழைய பொருட்களுடன் கிடத்தப்பட்டிருந்தது.
இச்சிலையில் புத்தரின் கண்கள் மூடிய நிலையில் தியானத்தில் உள்ளவாறு அமைக்கப்பட்டுள்ளது. ஓரடி உயரமுள்ள இச்சிலையில் காதுகள் இரண்டும் தோள்வரை நீண்டுள்ளன. மூக்கு சற்று சேதமடைந்த நிலையிலும் சுருள் சுருளான தலைமுடியுடனும், இடப்புறத் தோள்பட்டை முதல் இடுப்பு வரை சீவர ஆடையுடனும், இச்சிலையின் தலையில் சுருள் முடி போன்ற அமைப்பும், பின்புற மேலாடை (சீவர ஆடை) நேர்த்தியாகத் தெரியும் வகையிலும் அமைக்கப்பட்டுள்ளது.
காஞ்சிபுரம் மாவட்டத்தில் ஏற்கனவே புத்தகரம் கிராம பெருமாள் கோவிலில் 600 ஆண்டுகள் பழமை வாய்ந்த புத்தர் சிலையை வாலாஜாபாத் வரலாற்று ஆய்வு அமையத்தின் சார்பில் ஆய்வு செய்து கடந்த ஆண்டு செய்தி வெளியிடப்பட்டது.
தேவரியம்பாக்கத்தில் தியான நிலையில் உள்ள இந்த புத்தர் சிலையின் பெருமை என்னவென்றால், கிமு 3 ஆம் நூற்றாண்டில் பல்வேறு போர்களை தொடுத்த பேரரசர் அசோகர் தனது கடைசி போரான கலிங்கத்து போரை நடத்திய பின் போர்களை கைவிட்டு உலக அமைதிக்கான கவுதம புத்தரின் வழியை பின்பற்றி உலகெங்கும் புத்த அமைதி கோபுரங்களை நிறுவி உலகில் அமைதியை உருவாக்க முயன்றார். அத்தகைய கருத்தோடு ஒத்துபோகும் வகையில் இச்சிலையின் அமைப்பு அமைந்து இருப்பது பெறும் சிறப்புக்குரியதாகும்.
இந்த சிலை 900 ஆண்டுகள் பழமை வாய்ந்தது. காலம் கி.பி 11 ஆம் நூற்றாண்டைச் சேர்ந்ததாக இருக்க வாய்ப்புள்ளது என தொல்லியல் துறை உதவி தொல்லியல் ஆய்வாளர்கள் ரமேஷ், உதவி கல்வெட்டாய்வாளர்கள் நாகராஜன் மற்றும் பிரசன்னா ஆகியோரும் உறுதி செய்தனர்.
புத்தர் சிலை கிடைக்கப்பெற்ற தேவரியம்பாக்கம் பெருமாள் ஆலயம் 100 ஆண்டுகளுக்கு முன் ஓலைக் குடிசையாக இருந்ததாகவும், அதில் சீனிவாச பெருமாள் புகைப்படத்துடன் இச்சிலையை வைத்து வணங்கி வந்ததாகவும் முன்னோர்கள் சொல்லியதாக இவ்வாலயம் அருகே வசித்துவரும் இதே கிராமத்தைச் சேர்ந்தவர் தெரிவித்தார்.
இக்கள ஆய்வின்போது தேவரியம்பாக்கம் ஊராட்சியைச் சேர்ந்த கிராம நாட்டாமை நிர்வாகிகள் கோபி, பெருமாள், ரவி மற்றும் சாமியார் வெங்கடேசன் உள்ளிட்ட பலர் உடனிருந்தனர்.
