அண்ணாமலையார் கோயில் இணை ஆணையர் அலுவலகத்தை முற்றுகையிட முயற்சி: இந்து முன்னணியினர் கைது

திருவண்ணாமலை அருணாசலேஸ்வரா் கோயில் இணை ஆணையா் அலுவலகத்தை  முற்றுகையிடச் சென்ற இந்து முன்னணி நிா்வாகிகளை போலீஸாா் கைது செய்தனா்.

அருணாசலேஸ்வரா் கோயில் இணை ஆணையா் ஜோதி சில நாள்களுக்கு முன்பு கோயிலின் தலைமை சிவாச்சாரியாரை ஒருமையில் பேசியதாகக் கூறப்படுகிறது.

இதைக் கண்டித்து அன்றைய தினமே 25-க்கும் மேற்பட்ட சிவாச்சாரியாா்கள் தங்களது பணிகளை புறக்கணித்து, கோயில் வளாகத்தில் கோயில் யாகசாலை முன்பு போராட்டத்தில் ஈடுபட்டனா். போராட்டத்தை தொடர்ந்து காவல்துறையினர் மற்றும் கோயில் ஊழியர்கள் உள்துறை அலுவலகத்தில் அரங்காவலர் குழுவினருடன் சுமார் ஒரு மணி நேரத்திற்கு மேலாக பேச்சு வார்த்தை நடத்தி , சிவாச்சாரியார்களை சமாதானம் படுத்தும் முயற்சியில் ஈடுபட்டனர்.

மேலும் அறங்காவலர் குழுவினர் கோயில் இணை ஆணையரிடம் உரிய தகவலை கேட்டு பதில் அளிப்பதாகவும் தற்போது பூஜைகளை தொடர்ந்து செய்யுமாறும் கூறியதால் சிவாச்சாரியார்கள் தற்காலிகமாக போராட்டத்தை கைவிட்டனர்.

இந்த நிலையில், கோயில் இணை ஆணையரை தகுதி நீக்கம் செய்யக் கோரி, அவரது அலுவலகத்தை முற்றுகையிடப் போவதாக திருவண்ணாமலை தெற்கு மாவட்ட இந்து முன்னணி அமைப்பு அறிவித்திருந்தது.

இதனையடுத்து அருணாசலேஸ்வரா் கோயில், கோயில் இணை ஆணையா் அலுவலகம், நகரின் முக்கிய பகுதிகளில் 100-க்கும் மேற்பட்ட போலீஸாா் பாதுகாப்புப் பணியில் ஈடுபட்டனா். கோயிலுக்கு சுவாமி தரிசனம் செய்ய வந்த பக்தா்களையும் தீவிர சோதனைக்குப் பிறகே அனுமதித்தனா்.

இந்நிலையில் செட்டித் தெருவில் உள்ள திருமண மண்டபத்தில் இருந்து இந்து முன்னணி அமைப்பின் தெற்கு மாவட்ட பொதுச் செயலா் இரா.அருண்குமாா் தலைமையில் ஏராளமான நிா்வாகிகள் ஊா்வலமாக சென்று இணை ஆணையா் அலுவலகத்தை முற்றுகையிடுவதற்காக புறப்பட்டனா்.

தகவலறிந்த காவல்துறையினர் விரைந்து வந்து, அருண்குமாா், தெற்கு மாவட்டச் செயலா்கள் நாகா.செந்தில், சரவணன், நகர பொதுச் செயலா் மஞ்சுநாதன் உள்ளிட்ட நிா்வாகிகளை கைது செய்து  அவர்களை தனியார் திருமண மண்டபத்தில் தங்க வைத்தனர் .

திருமண மண்டபத்தில் தங்க வைக்கப்பட்ட இந்து முன்னணியினர் அங்கு உண்ணாவிரதப் போராட்டத்தில் ஈடுபட்டதால் பரபரப்பு ஏற்பட்டது.  பின்னர் அவர்கள் மாலை விடுவிக்கப்பட்டனர்.