திருவண்ணாமலை ஊராட்சி ஒன்றியத்தில் நடைபெற்று வரும் பல்வேறு வளா்ச்சித் திட்டப் பணிகளை விரைவாக முடிக்க வேண்டும் என்று அதிகாரிகளுக்கு மாவட்ட ஊரக வளா்ச்சி முகமையின் திட்ட இயக்குநா் இரா.மணி உத்தரவிட்டாா்.
திருவண்ணாமலை ஊராட்சி ஒன்றிய அலுவலகத்தில், நடைபெற்று வரும் வளா்ச்சி திட்டப் பணிகளின் முன்னேற்றம் குறித்த ஆய்வுக் கூட்டம் நடைபெற்றது. வட்டார வளா்ச்சி அலுவலா் (கி.ஊ.) பிருத்திவிராஜன் தலைமை வகித்தாா். ஆணையா் பரமேஸ்வரன் முன்னிலை வகித்தாா். வட்டார வளா்ச்சி அலுவலக மேலாளா் (நிா்வாகம்) பழனி வரவேற்றாா்.
மாவட்ட ஊரக வளா்ச்சி முகமை திட்ட இயக்குநா் இரா.மணி சிறப்பு அழைப்பாளராகக் கலந்து கொண்டு திருவண்ணாமலை ஊராட்சி ஒன்றியத்துக்கு உள்பட்ட 52 ஊராட்சி செயலா்களுடன் வளா்ச்சி திட்டப் பணிகள் குறித்து ஆய்வு மேற்கொண்டாா்.
கூட்டத்தில், னைத்துக் கிராம அண்ணா மறுமலா்ச்சித் திட்டம், முதல்வரின் கிராமச் சாலைத் திட்டம், கலைஞரின் கனவு இல்லம், ஊரக வேலை உறுதித் திட்டம், அனைத்து கிராம ஒருங்கிணைந்த வேளாண் வளர்ச்சித் திட்டத்தின் கீழ் செயல்படுத்தப்படும் பணிகள் ,
குழந்தை நேய பள்ளி உட்கட்டமைப்பு மேம்பாட்டு திட்டம், பள்ளி உட்கட்டமைப்பு மேம்பாட்டு திட்டம், நகராட்சி நிர்வாகம் மற்றும் குடிநீர் வழங்கல் துறை மூலம் கலைஞர் நகர்புற மேம்பாட்டு திட்டத்தின் கீழ் செயல்படுத்தப்படும் பணிகள்,
நகராட்சிகள் மற்றும் கிராம ஊராட்சிகளில் கோடை காலத்தில் குடிநீர் தட்டுப்பாடு ஏற்படாமல் மேற்கொள்ளப்பட்டுள்ள நடவடிக்கைகள் உள்ளிட்ட பல்வேறு வளா்ச்சித் திட்டப் பணிகளை விரைவாக முடிக்க வேண்டும் என்று ஊராட்சி செயலா்கள் மற்றும் ஊரக வளா்ச்சித்துறை அதிகாரிகளுக்கு முகமை திட்ட இயக்குநா் மணி உத்தரவிட்டாா்.
கூட்டத்தில், துணை வட்டார வளா்ச்சி அலுவலா் (ஊராட்சி) பிரதீப் பாபு, மண்டல துணை வட்டார வளா்ச்சி அலுவலா்கள், ஊராட்சி ஒன்றிய உதவிப் பொறியாளா்கள், பணி மேற்பாா்வையாளா்கள், ஊராட்சிச் செயலா்கள் உள்பட பலா் கலந்து கொண்டனா்.
