திருவண்ணாமலையில் விதிமுறைகளை மீறி இயக்கிய 14 ஆட்டோக்கள் மற்றும் 2 சரக்கு வாகனங்களை வட்டாரப் போக்குவரத்து அலுவலா்கள் பறிமுதல் செய்தனா்.
திருவண்ணாமலை நகரில் பல ஆட்டோக்கள் விதிமுறைகளை மீறி இயக்கப்படுவதாக மாவட்ட நிா்வாகத்துக்கு புகாா்கள் சென்றன. இதையடுத்து உரிய நடவடிக்கை எடுக்கும்படி வட்டாரப் போக்குவரத்து அலுவலருக்கு மாவட்ட ஆட்சியா் க.தா்ப்பகராஜ் உத்தரவிட்டாா்.
இதன் பேரில், வட்டாரப் போக்குவரத்து அலுவலா்கள் கே.கருணாநிதி (திருவண்ணாமலை), சிவக்குமாா் (ஆரணி) ஆகியோா் தலைமையில் மோட்டாா் வாகன முதுநிலை ஆய்வாளா்கள் ஆா்.பெரியசாமி, முருகேசன், விஜய், வட்டாரப் போக்குவரத்து அலுவலக நோ்முக உதவியாளா் பொன்சேகா் உள்ளிட்டோா் அடங்கிய குழுவினா் போக்குவரத்து போலீஸாருடன் இணைந்து வேங்கிக்கால் அண்ணா நுழைவு வாயில் அருகே வாகனச் சோதனை மேற்கொண்டனா்.
அப்போது வெளி மாவட்ட ஆட்டோக்களை இயக்கியது, ஆவணங்கள் இல்லாமல் இருந்தது, தகுதி சான்று புதுப்பிக்காதது, அனுமதி சீட்டு பெறாமல் இருந்த து, ஓட்டு நர் உரிமம் இல்லாதது, அதிக பயணிகளை ஏற்றிச் சென்றது போன்ற விதிமீறல்களுக்காக 14 ஆட்டோக்களையும், சரக்கு வாகனத்தில் பணிகளை ஏற்றிச் சென்றதாக 2 டாட்டா ஏஸ் வாகனத்தையும் வட்டாரப் போக்குவரத்து அலுவலர்கள் பறிமுதல் செய்தனர்.
மேலும் ஸ்போ் மீட்டா் இல்லாமல் இயக்கப்பட்ட 10 ஆட்டோக்களுக்கு தலா ரூ.5 ஆயிரம் அபராதம் விதிக்கப்பட்டு, பயணிகளிடம் அதிக கட்டணம் வசூலிக்கக் கூடாது என அறிவுரை வழங்கப்பட்டது. மீறினால் வாகனங்கள் பறிமுதல் செய்யப்படும் என எச்சரிக்கை விடுக்கப்பட்டது. பறிமுதல் செய்யப்பட்ட ஆட்டோக்களுக்கு ரூ.2.50 லட்சம் அபராதம் விதிக்கப்பட்டது.
பொதுமக்கள் பக்தர்கள் கோரிக்கை
திருவண்ணாமலை கிரிவலப் பாதையில் ஆட்டோக்கள் அதிகளவில் பயணிகளை ஏற்றி கொண்டு வேகமாக செல்வதால் கிரிவலப் பாதையில் கிரிவலம் வரும் பக்தர்கள் மிகவும் சிரமத்திற்கு உள்ளாகின்றனர். எனவே கிரிவலப் பாதையில் ஆட்டோக்கள் முழுமையாக தடை செய்ய வேண்டும்.
மேலும் அண்ணா சிலை , குய மட தெரு, சென்னப்பர் தெரு, செட்டி தெரு உள்ளிட்ட தெருக்களில் ஆட்டோக்கள் அதிகளவில் பயணிகளை ஏற்றிக்கொண்டு வேகமாக செல்வதால் அப்பகுதிகளில் போக்குவரத்து நெரிசல் ஏற்பட்டு வேலைக்கு செல்பவர்கள் , பள்ளிக்கு செல்லும் மாணவ மாணவிகள் பெரிதும் பாதிக்கப்படுகின்றனர். எனவே அப்பகுதிகளிலும் மாவட்ட நிர்வாகம், காவல்துறையினர், போக்குவரத்து துறையினர் ஆய்வு மேற்கொண்டு தகுந்த நடவடிக்கை எடுக்க வேண்டும் என பொதுமக்கள் பக்தர்கள் கோரிக்கை விடுத்தனர்.
