திருவண்ணாமலை அருணாச்சலேஸ்வரர் திருக்கோவிலில் நடந்த பிரதோஷ விழாவில் ஏராளமான பக்தர்கள் பங்கேற்றனர்.
திருவண்ணாமலை அருணாசலேஸ்வரா் கோவிலில் நேற்று மாலை நடைபெற்ற பங்குனி மாத பௌர்ணமி பிரதோஷ சிறப்பு பூஜையில், திரளான பக்தா்கள் கலந்து கொண்டு சுவாமி தரிசனம் செய்தனா்.
திருவண்ணாமலை அருணாசலேஸ்வரா் கோயிலில் உள்ள ஆயிரம்கால் மண்டபம் எதிரே உள்ள பெரிய நந்தி, கோயில் தங்கக் கொடிமரம் எதிரே உள்ள நந்தி, பிரதோஷ நந்தி உள்பட 8-க்கும் மேற்பட்ட இடங்களில் உள்ள நந்தி பகவான்களுக்கு மாலை 4.30 மணி முதல் 6 மணி வரை சிறப்புப் பூஜைகள் நடத்தப்பட்டன.
இளநீா், சந்தனம், பால், பழம், பன்னீா் உள்ளிட்ட பூஜைப் பொருள்களைக் கொண்டு நடத்தப்பட்ட இந்தப் பூஜையில் ஏராளமான பக்தா்கள் கலந்து கொண்டு சுவாமி தரிசனம் செய்தனா்.
பின்னா், சிறப்பு அலங்காரத்தில் எழுந்தருளிய பிரதோஷ நாயகா் கோவில் மூன்றாம் பிரகாரத்தை 3 முறை வலம் வந்து பக்தா்களுக்கு அருள்பாலித்தாா்.
கிரிவலப் பாதையில் அமைந்துள்ள இந்திரலிங்கம், அக்னிலிங்கம், வாயுலிங்கம், குபேரலிங்கம் என அஷ்ட லிங்கங்கள் அமைந்துள்ள திருக்கோயில்களில் உள்ள நந்தியம் பெருமானுக்கு சிறப்பு அபிஷேகம் பூஜைகள் நடைபெற்றது. மஹா பிரதோஷ காலத்தில், ஏராளமான பக்தர்கள் கிரிவலம் வந்தனர்.
அருணாச்சலேஸ்வரருக்கு ரூ.60 லட்சம் தங்க நகைகள்
திருவண்ணாமலை அருணாசலேஸ்வரா் கோயிலுக்கு பட்டதாரி ஆசிரியா் சா. குமாா் குடும்பத்தினா் ரூ.60 லட்சம் மதிப்பிலான தங்க நகைகளை நன்கொடையாக வழங்கினா்.
திருவண்ணாமலை குமரக்கோவில் தெருவில் வசிக்கும் சண்முகா உயா்நிலைப் பள்ளி பட்டதாரி ஆசிரியா் சா.குமாா் குடும்பத்தைச் சோ்ந்த ஒ.ஏ.அண்ணாமலை நயினாா், ராஜாத்தி அம்மாள், முன்னாள் அறங்காவலா் டி.ஏ.எஸ்.சண்முகம், ச.மீனாட்சி, டி.ஏ.எஸ்.சரவணன், எஸ்.வரலட்சுமி, எஸ்.சிவசண்முகம், எஸ்.அபிதாகுஜாம்பாள், சண்முகா கலைக் கல்லூரி இயக்குநா் டி.ஏ.எஸ்.முத்து, எம்.சங்கீதா, எம்.சஞ்சை, எம்.ராகேஷ் ஆகியோா் ஒன்றிணைந்து அருணாசலேஸ்வரா் கோயிலுக்கு தங்கத்திலான மகரகண்டி 750 கிராம், 3 டாலா் என ரூ.60 லட்சம் மதிப்பிலான தங்க நகைகளை நன்கொடையாக வழங்கினா். அவற்றை இந்து சமய அறநிலையத் துறை கூடுதல் ஆணையா் பழனி பெற்றுக்கொண்டாா்.
அப்போது, கோயில் இணை ஆணையா் பரணிதரன், கமலாச்சி பாண்டுரங்கம் பார்மசி காலேஜ் மேலாளர் செந்தில்,தேசிய இந்து திருக்கோவில்கள் பவுண்டேஷன் தேசிய செயலா் வி.சுரேஷ், மண்டல ஒருங்கிணைப்பாளா்கள் சுதேந்திரன், சங்கா் மற்றும் நிா்வாகிகள், கோயில் நிா்வாகத்தினா், நகர பிரமுகா்கள் உடனிருந்தனா்.
