பறவைகள் கூடு கட்டும் முறை அவற்றின் வாழ்வியல் மற்றும் உயிர் பிழைப்புக்கு மிகவும் இன்றியமையாதது. உலகில் சில பறவை இனங்கள், மற்ற உயிரினங்களிடமிருந்து முற்றிலும் மாறுபட்ட, பிரமிக்க வைக்கும் கூடுகளைக் கட்டும் கலையை வளர்த்துக்கொண்டுள்ளன. களிமண்ணால் செய்யப்பட்ட அடுப்புகள் முதல், மரக் கிளைகளில் தொங்கும் நெய்த பைகள் வரை, இயற்கையின் இந்தச் சிறிய கட்டிடக் கலைஞர்கள் கட்டும் தனித்துவமான கூடுகள் பற்றி பார்க்கலாம்.
மாண்டேஸுமா ஓரோபெண்டோலா
கரீபியன் தாழ்நிலப் பகுதிகளில் காணப்படும் இந்தப் பறவைகள், முழு மரத்தையும் ஒரு அடுக்குமாடி குடியிருப்பாக மாற்றிவிடுகின்றன.
இவை தாவர நார்கள் மற்றும் கொடிகளைப் பயன்படுத்தி நீளமான, தொங்கும் கூடை வடிவக் கூடுகளை நெய்கின்றன. இந்தக் கூடுகள் ஆறு அடி நீளம் வரை வளரக்கூடியவை.
ஒரே ஒரு மரத்தில் 30 முதல் 150-க்கும் மேற்பட்ட கூடுகள் கொண்ட காலனியாக இவை வாழ்கின்றன.
இவற்றின் கூடுகள் பொதுவாக குளவிக் கூட்டங்களுக்கு அருகில் உள்ள கிளைகளில் அமைந்திருக்கும். குளவிகளைப் பயன்படுத்தி, மற்ற வேட்டையாடிகளிடமிருந்து தங்கள் கூட்டைக் காத்துக்கொள்கின்றன.
யுரேஷியன் பெண்டுலைன் டிட்
இது ஒரு சிறிய பறவை இனமாகும். இதன் கூடுகள் பார்க்க ஒரு கைவினைப் பொருள் போல இருக்கும்.
ஆண் பறவை, பிர்ச் அல்லது வில்லோ போன்ற மரக் கிளையில் தொங்கிக்கொண்டு, தாவர நார்கள் மற்றும் பட்டுப் போன்ற விதைகளைப் பயன்படுத்தி, மென்மையான, பை வடிவக் கூட்டை தைத்து உருவாக்கத் தொடங்குகிறது. பெண் பறவை பின்னர் அந்தக் கூட்டிற்கு இறுதி வடிவத்தை அளிக்கிறது. இது மிகவும் நுட்பமான, அடுக்கு மாடிக் கட்டமைப்பைக் கொண்டது.
ரெட் ஓவன் பறவை
அர்ஜென்டினாவின் தேசியப் பறவையான இது, அதன் பெயருக்கேற்றாற்போல் ஒரு கூட்டைக் கட்டுகிறது.
இந்தக் கூடுகள் மரங்கள், கம்பங்கள் அல்லது தொலைபேசிக் கம்பங்களின் மேல் சிறு களிமண் அடுப்புகள் போல குவிமாட வடிவில் கட்டப்படுகின்றன. இந்தக் கூடுகளைக் களிமண் கொண்டு முடிக்க ஒரு வாரம் முதல் பல மாதங்கள் வரை ஆகலாம்.
சில அடுப்புப் பறவைகள் பழைய கூடுகளையே மீண்டும் பயன்படுத்துகின்றன, மற்றவை பழைய கூட்டின் மேல் புதிய கூடுகளைக் கட்டி, அதை ஒரு களிமண் அடுக்குமாடிக் குடியிருப்பைப் போல உருவாக்குகின்றன.
ஹாமர்காப்
ஆப்பிரிக்கா முழுவதும் காணப்படும் ஹாமர்காப் பறவைகள், கூடு கட்டுவதில் உச்சத்தை எட்டுகின்றன.
இவற்றின் கூடுகள் பிரமாண்டமான குவிமாடக் கூடுகள் ஆகும். இவை 1.5 மீட்டருக்கு மேல் அகலமாக வளரக்கூடியவை. சுமார் 10,000-க்கும் மேற்பட்ட குச்சிகளைக் கொண்டு கட்டப்படும் இந்தக் கூடுகள் ஒரு மனிதனின் எடையைத் தாங்கும் அளவுக்கு வலிமையானவை.
இவை கூட்டின் உட்புறத்தை களிமண்ணால் பூசி, மேலும் வெளியிலிருந்து சேகரிக்கும் பிரகாசமான பொருட்களைக் கொண்டு அலங்கரிக்கின்றன. இனப்பெருக்கம் செய்யாத காலங்களில் கூட இவை கூடுகளைக் கட்டும் பழக்கம் கொண்டவை.
கிலா மரங்கொத்தி
சோனோரன் பாலைவனத்தில் வாழும் கிலா மரங்கொத்திகள், மிகவும் கடினமான பொருளில் தங்கள் வீட்டைக் கட்டுகின்றன.
இவை சாகுவாரோ கள்ளியில் தங்கள் வீடுகளைச் செதுக்குகின்றன. பறவை ஒரு சிறிய துவாரம் போட்டு, உள்ளே ஒரு அறையை உருவாக்குகிறது. கள்ளி தனது காயத்தை குணப்படுத்த, பிசின் மூலம் அந்த காயத்தை மூடுகிறது. இதனால், கூட்டின் உள்ளே ‘பூட்’ என்று அழைக்கப்படும் கடினமான உள் ஓடு உருவாகிறது. இது வெப்பநிலையிலிருந்து பாதுகாக்கும் இயற்கையான அமைப்பாக செயல்படுகிறது.
இந்தப் பறவைகளின் தனித்துவமான கட்டிடக் கலை, இயற்கை உலகின் மாறுபட்ட வாழ்வியல் முறைகளுக்குச் சிறந்த எடுத்துக்காட்டுகளாகத் திகழ்கின்றன.