வாடிப்பட்டி ராஜா ஹாக்கி அகடமி மற்றும் எவர் கிரேட் ஆக்கி கிளப் இணைந்து ஏ. ஆர். எஸ். டிராபி 2025 ஹாக்கித் தந்தை எல்.ராஜூ, உதவி மின் பொறியாளர் வீராசாமி ஆகியோர் நினைவாக அகில இந்திய ஹாக்கி போட்டி அரசு ஆண்கள் மேல்நிலைப் பள்ளியில் 5 நாட்கள் நடந்தது.
இந்த போட்டியில் தமிழ்நாடு, கேரளா, கர்நாடகா, ஆந்திரா உள்ளிட்ட மாநிலங்களைச் சேர்ந்த 12 அணிகள் விளையாடினர். இதன் இறுதிப் போட்டியில், மதுரை ஜி.கே மோட்டார்ஸ் அணி சென்னை சிட்டி போலீஸ் அணியை 2:1என்ற கோல் கணக்கில் வெற்றி பெற்று சாம்பியன் பட்டத்தையும் முதல் பரிசு சுழல் கோப்பை மற்றும் ரொக்க பணம் ரூ.50 ஆயிரத்தையும் தட்டிச் சென்றது.
இரண்டாம் பரிசு சென்னை சிட்டி போலீஸ் அணிக்கு ரூ.30 ஆயிரமும், சுழல் கோப்பையும், பெங்களூர் எஸ் டி சி அணிக்கு மூன்றாம் பரிசு ரூ.20 ஆயிரம் சுழல் கோப்பையும், பாண்டிச்சேரி குருவி நத்தம் அணிக்கு நான்காம் பரிசு ரூ.10 ஆயிரம் சுழல் கோப்பையும் வழங்கப்பட்டது.
இந்த விழாவில் இந்திய ஹாக்கி அணி பயிற்சியாளர் சி.ஆர்.குமார் தலைமை தாங்கினார். தொழிலதிபர் தங்கராஜ், ராஜன் மருத்துவமனை நிர்வாக இயக்குனர் டாக்டர் மெல்வின், இந்தியன் வங்கி மண்டல மேலாளர் பாலசுப்பிர மணியன் ஆகியோர் முன்னிலை வைத்தனர்.
ஏ ஆர் எஸ் ஸ்டீல்ஸ் நிறுவன துணை நிதி இயக்குனர் பிரபு சுழல் கோப்பை மற்றும் ரொக்க பரிசுகள் வழங்கினர். இந்திய ஹாக்கி அணி முன்னாள் கேப்டன் ராஜா வரவேற்றார்.
இதில் தாய் பள்ளி நிர்வாகி எஸ்.வி. காந்தி, எவர்கிரேட் ஹாக்கி சங்க செயலாளர் சிதம்பரம், உடற்கல்வி ஆசிரியர் சுரேஷ், வங்கி மேலாளர் கமல கண்ணன், கவுன்சிலர் ஜெயகாந்தன், மதுரை மாவட்ட ஹாக்கி சங்கத் தலைவர் ஏ.ஜி. கண்ணன், வழக்கறிஞர் செல்வகுமார், மாதவன், ரத்னா குரூப் தலைவர் தனசேகரன், வாண்டையார் ட்ரஸ்ட் தலைவர் ராஜ்மோகன் உள்பட பலர் கலந்து கொண்டனர்.
முன்னதாக, சுழல் கோப்பை ஊர்வலத்தை பேரூராட்சி தலைவர் பால்பாண்டியன் தலைமை தாங்கி தொடக்கி வைத்தார். முடிவில், ராஜா அகாடமி துணைத் தலைவர் தம்பிதுரை நன்றி கூறினார்.
