விழுப்புரம் மாவட்டம் மேல்மலையனூரில் பிரசித்தி பெற்ற அங்காளம்மன் கோவில் உள்ளது. இக்கோவிலில் ஒவ்வொரு மாதமும் அமாவாசை அன்று ஊஞ்சல் உற்சவம் நடைபெறுவது வழக்கம். அந்த வகையில் நேற்று முன்தினம் நடைபெற்ற ஊஞ்சல் உற்சவத்தில் அங்காளம்மன் ஷேச சயன அலங்காரத்தில் பக்தர்களுக்கு அருள் பாலித்தார்.
அச்சமயம் திடீரென்று தமிழக வெற்றி கழகத்தின் பொதுச்செயலாளர் புஸ்சி ஆனந்த் மஞ்சள் வேட்டி சட்டை சகிதம் வந்து கையில் ஒரு பையை எடுத்து வந்தார்.
தான் கையோடு எடுத்து வந்திருந்த விஜய் படம் அச்சிடப்பட்ட ஒரு பையை, உற்சவரின் பொற்பாதத்தில் வைத்து பயபக்தியுடன் வழிபட்டார். அதன் பிறகு, அம்மனின் குங்கும பிரசாதத்தை நெற்றியில் இட்டு, பயபக்தியுடன் அந்தப் பையை வாங்கி, கண்ணில் ஒற்றி எடுத்துச் சென்றார்.
“அந்தப் பையில் என்ன விசேஷம்” என அங்கிருந்தவர்கள் கேட்டதற்கு பதில் ஏதும் கூறாமல் புன்னகையுடன் நடையை கட்டினார் ஆனந்த்.
பையில் இருந்தது வேட்பாளர் பட்டியலா? அல்லது வேறு ஆவணங்களா? என்று சமூக வலைத்தளங்களில் அந்த புகைப்படத்தை மேற்கோள்காட்டி நெட்டிசன்கள் கேள்வி எழுப்பி வருகின்றன. இது குறித்த புகைப்படங்களும் சமூக வலைத்தளங்களில் வைரலாகி வருகிறது.
இன்னும் சிலரோ, ‘பத்திரம் போல் ஒன்று இருந்ததை நாங்கள் பார்த்தோம்’ என்று கருத்துச் சொல்லியதை அடுத்து, “ஒருவேளை, ஆனந்த் மற்றும் விஜய்யின் வேட்பு மனு படிவங்கள் அதில் இருந்திருக்கலாம்” என்றும் பேச ஆரம்பித்திருக்கிறார்கள்.
தொடா்ந்து ஆனந்த் தியான மேடையில் அமா்ந்து தங்கள் கட்சியின் வெற்றிக்காக சிறிது நேரம் வழிபட்ட பின் அங்கிருந்து புறப்பட்டுச் சென்றாா்.
தமிழ்நாட்டின் பல்வேறு மாவட்டங்களில் இருந்து இந்த திருக்கோயிளுக்கு நாள்தோறும் ஆயிரக்கணக்கான பக்தர்கள் வருகை தருகின்றனர். அமாவாசை தினத்தில் பக்தர்களின் வருகை இயல்பு நாட்களைவிட பல மடங்கு அதிகமாக இருக்கும். ஏனெனில், அன்றைய தினத்தில் மேல்மலையனூர் அம்மனை தரிசனம் செய்தால் தங்கள் பிரச்சனைகள் மறைந்து வாழ்க்கையில் இன்பங்கள் அதிகரித்து வாழ்க்கை செம்மையாக இருக்கும் என்று கூறப்படுகிறது.
அம்மன் காலடியில் வைத்து வணங்கிய பையில் என்ன இருந்தது என்பது அந்த அம்மனுக்கும் ஆனந்துக்குமே வெளிச்சம்.
