பிரதமர் மோடியின் தொலைநோக்கு தலைமையின் கீழ், 2025ம் ஆண்டில் 200-க்கும் மேற்பட்ட முக்கிய சாதனைகள் எட்டப்பட்டுள்ளதாக இஸ்ரோ தலைவர் நாராயணன் தெரிவித்தார்.
பெங்களூருவில் நடைபெற்ற ‘வளர்ந்து வரும் அறிவியல், தொழில்நுட்பம் மற்றும் புத்தாக்க மாநாடு 2025’-இன் தொடக்க விழாவில் அவர் பேசியதாவது: இந்தியா தனது முதல் ‘சவுண்டிங் ராக்கெட்டை’ திருவனந்தபுரத்திற்கு அருகிலுள்ள தும்பாவிலிருந்து நவம்பர் 21, 1963 அன்று ஏவியது. அந்த தொடக்கத்தில் இருந்து, இந்தியா மகத்தான முன்னேற்றம் அடைந்துள்ளது
இந்த ஆண்டு ஜனவரி மாதம் முதல் இப்போது வரை, நமது பிரதமர் மோடியின் தொலைநோக்கு தலைமையின் கீழ் 200-க்கும் மேற்பட்ட குறிப்பிடத்தக்க சாதனைகள் செய்யப்பட்டுள்ளன. ஜன. 6 அன்று தொடங்கப்பட்டு, இன்று வரை ஆதித்யா-எல்1 திட்டத்தின் சுமார் 15 டெராபைட் அறிவியல் தகவல்கள் தரவுகள் பொதுமக்களுக்குக் கிடைக்கச் செய்யப்பட்டுள்ளன.
இந்தியாவின் முதல் சுற்றுப்பாதை இணைவுச் சோதனையான ‘ஸ்பேடெக்ஸ் வெற்றிகரமாக நிகழ்த்தப்பட்டது. மணிக்கு 28,400 கி.மீ வேகத்தில் பயணிக்கும் இரண்டு செயற்கைக்கோள்களை வெற்றிகரமாக இணைக்கும் இந்தச் சிக்கலான செயல்பாட்டை நிரூபித்த உலகின் நான்காவது நாடாக இந்தியா உருவெடுத்துள்ளது.
ஜன 29 அன்று விண்ணில் ஏவப்பட்ட ஜிஎஸ்எல்வி-எப்15, ஸ்ரீஹரிகோட்டாவில் உள்ள சதீஷ் தவான் விண்வெளி மையத்தில் இருந்து மேற்கொள்ளப்பட்ட 100-வது பெரிய வாகனத் திட்டமாகும்.
ஜூலை 30 அன்று ஏவப்பட்ட நிசார் செயற்கைக்கோள் மற்றொரு “பெருமைமிக்க மைல்கல்” ஆகும். இது நாசா மற்றும் இஸ்ரோவின் கூட்டு முயற்சியில் உருவான மிக முக்கியமான திட்டங்களில் ஒன்றாகும்.
இந்தியாவின் ஏவுதல் திறன்களை அதிகரிக்க, தமிழ்நாட்டில் ரூ. 400 கோடி ஒதுக்கீட்டில் மூன்றாவது ஏவுதளம் அமைப்பதற்கு ஒப்புதல் அளிக்கப்பட்டுள்ளது.
விண்வெளித் துறை தனியார் நிறுவனங்கள் மற்றும் ஸ்டார்ட்அப்களை தீவிரமாக ஊக்குவித்து வருகிறது. இந்தியாவின் 60 ஆண்டுகால விண்வெளி அறிவியலின் அனுபவம் கூட்டு தேசிய முன்னேற்றத்தை உறுதிப்படுத்த தனியார் துறையுடன் பகிர்ந்து கொள்ளப்படுகிறது.
வரவிருக்கும் மாநாடு 2025 விண்வெளித் தொழில்நுட்பங்களை மையமாகக் கொண்டிருக்கும். இது ‘விக்சித் பாரத் 2047’ என்ற தேசிய தொலைநோக்குப் பார்வையை நிறைவேற்றுவதற்கான கூட்டு முயற்சிகளுக்கு உதவும் என்று அவர் தெரிவித்தார்.
