ரயில் தண்டவாளங்களைக் கடக்கும்போது அல்லது அருகில் நிற்கும் போது, அந்த தண்டவாளங்களுக்கு அடியிலும் அதைச் சுற்றிலும் குவிந்து கிடக்கும் ஜல்லி கற்களை பார்த்திருக்கலாம். அவை வெறுமனே அழகிற்காகவோ அல்லது சாதாரணமாகவோ போடப்பட்டவை அல்ல. அவற்றின் பயன்பாடு மிகவும் முக்கியமானது.
இந்தக் கற்கள் “டிராக் பேலஸ்ட்” என்று அழைக்கப்படுகின்றன. ரயில் பாதையின் உறுதித்தன்மைக்கும், பாதுகாப்பான இயக்கத்திற்கும் அவை இன்றியமையாதவை.
ரயில்வே பேலஸ்ட் பொதுவாக கிரானைட், பசால்ட் அல்லது குவார்ட்சைட் போன்ற கடினமான, கோணல் வடிவ கற்களால் ஆனது.
இந்தக் கற்கள் அவற்றின் வலிமை மற்றும் கடினமான அமைப்புக்காகத் தேர்ந்தெடுக்கப்படுகின்றன. அவற்றின் விளிம்புகள் ஒன்றுக்கொன்று இறுக்கமாகப் பிணைந்து, தண்டவாளங்களுக்கு வலுவான மற்றும் நெகிழ்வான தளத்தை அளிக்கின்றன.
இந்தியாவில், அவற்றின் நீடித்த உழைப்புத் திறன் மற்றும் சிறந்த வடிகால் திறனுக்காக ஜல்லிக்கற்கள் பரவலாகப் பயன்படுத்தப்படுகிறது.
பேலஸ்ட் கற்கள் பொதுவாக அவற்றின் இயற்கையான நிறமான சாம்பல் நிறத்திலேயே இருக்கின்றன. இது அழுக்கு, எண்ணெய் கறைகள் மற்றும் துரு ஆகியவற்றைக் குறைத்துக் காண்பிக்கவும், சூரிய ஒளியில் அதிக வெப்பத்தை உறிஞ்சாமல் இருக்கவும் உதவுகிறது.
தண்டவாளத்தை நிலைநிறுத்துதல்
தண்டவாளத்தின் அடியில் உள்ள கூர்மையான விளிம்புகளைக் கொண்ட இந்தக் கற்கள், ரயில் செல்லும்போது உண்டாகும் மிகப்பெரிய அழுத்தத்தை சமமாகப் பரப்பி, தண்டவாளங்கள் வளைந்து கொடுக்காமல் அல்லது மண்ணுக்குள் புதைந்து போகாமல் தடுக்கிறது. மேலும் இவை ஸ்லீப்பர்கள் உறுதியாக நிலையாக இருக்க உதவுகின்றன..
மழைநீரை வெளியேற்றுதல்
இந்த பேலஸ்ட் கற்களுக்கு இடையே உள்ள இடைவெளிகள், மழைநீரை மிக விரைவாக வடிகட்டி, தண்டவாளத்தின் அடியில் நீர் தேங்குவதைத் தடுக்கின்றன. நீர் தேங்காமல் தடுப்பதால், தண்டவாளங்களுக்குக் கீழே உள்ள மண் பலவீனமடையாமல் பாதுகாக்கப்படுகிறது. இது தண்டவாளங்கள் துருப்பிடிப்பதைத் தடுத்து, சீரான ரயில் போக்குவரத்தை உறுதி செய்கிறது.
அதிர்வுகளையும் சத்தத்தையும் குறைத்தல்
ரயில் அதிவேகத்தில் கடந்து செல்லும்போது ஏற்படும் கடுமையான அதிர்வுகளை இந்த பேலஸ்ட் கற்கள் ஒரு இயற்கை ஷாக் அப்சார்பர் போலச் செயல்படுகின்றன. இது தண்டவாளம், ஸ்லீப்பர்கள் மற்றும் அருகிலுள்ள கட்டிடங்கள் மீதான அழுத்தத்தைக் குறைக்கிறது. மேலும், இது சத்தத்தைக் குறைக்கவும் உதவுகிறது.
களைகள் வளர்வதைத் தடுத்தல்
கற்கள் இறுக்கமாக இல்லாமல் தளர்வாக இருப்பதால் அவை ஈரப்பதத்தைத் தக்கவைக்காது. இதனால், தண்டவாளங்களுக்கு இடையில் தேவையற்ற தாவரங்கள், களைகள் அல்லது புற்கள் வளராது. இதனால் களைகளின் வேர்கள் தண்டவாளத்தின் கட்டமைப்பைச் சீர்குலைப்பதைத் தடுக்க இது உதவுகிறது. இதனால் தண்டவாளத்தைச் சுத்தம் செய்யும் தேவையும், பராமரிப்புச் செலவுகளும் குறையும்.
எளிய பராமரிப்பு
இந்த பேலஸ்ட் கற்கள் தேவைப்படும்போது எளிதாக அகற்றப்பட்டு, சுத்தம் செய்யப்பட்டு, மீண்டும் பயன்படுத்தப்படலாம். தளர்வான அமைப்பு காரணமாக, பழுதுபார்ப்பு அல்லது ஆய்வுப் பணிகளின்போது ஸ்லீப்பர்கள் மற்றும் தண்டவாளங்களை எளிதில் அணுக முடிகிறது. இது ரயில்வே நெட்வொர்க்கின் பராமரிப்புப் பணிகளைச் சிக்கனமாகவும் விரைவாகவும் நிர்வகிக்க உதவுகிறது.
இந்தக் கற்கள் நிரந்தரமானவை அல்ல. இவற்றை இந்திய ரயில்வே வழக்கமாக ஒவ்வொரு 8 முதல் 10 வருடங்களுக்கு ஒருமுறை இவற்றைச் சுத்தம் செய்கிறது அல்லது மாற்றுகிறது.
