அமெரிக்காவில் வசிப்பதற்கு விசா கோரும் வெளிநாட்டினருக்கு, உடல் பருமன், நீரிழிவு நோய், இதய நோய்கள் உள்ளிட்ட நாள்பட்ட நோய்கள் இருந்தால், அவர்களின் விசா விண்ணப்பங்கள் நிராகரிக்கப்படலாம் என்று அமெரிக்க வெளியுறவுத்துறை புதிய வழிகாட்டுதல்களை வெளியிட்டுள்ளது.
ட்ரம்ப் நிர்வாகத்தால் வெளியிடப்பட்ட இந்த புதிய விதிமுறைகள், நாள்பட்ட நோய்கள் உள்ளவர்கள் அமெரிக்க அரசாங்கத்திற்கு ‘பொதுச் சுமையாக’ மாறக்கூடும் என்ற அடிப்படையில் விசா மறுக்க வழிவகுக்கும்.
புதிய மருத்துவ நிலைமைகள்:
தொற்று நோய்கள், தடுப்பூசி வரலாறு மற்றும் மனநலப் பிரச்சினைகள் ஆகியவை எப்போதும் விசா பரிசோதனையின் ஒரு பகுதியாக இருந்த நிலையில், இந்த புதிய வழிகாட்டுதல்கள் பல புதிய மருத்துவ நிலைமைகளைச் சேர்த்துள்ளன.
- இருதய நோய்கள்
- சுவாச நோய்கள்
- புற்றுநோய்கள்
- நீரிழிவு நோய்
- வளர்சிதை மாற்ற நோய்கள்
- நரம்பியல் நோய்கள்
- மனநலப் பிரச்சினைகள்
ஆகியவற்றிற்கு நூற்றுக்கணக்கான பில்லியன் டாலர்கள் மதிப்புள்ள சிகிச்சை தேவைப்படலாம் என்று அமெரிக்க வெளியுறவுத்துறை தெரிவித்துள்ளது.
விண்ணப்பதாரர்கள் பொது பண உதவியை நாடாமல் அல்லது அரசாங்கச் செலவை நீண்ட காலம் நாடாமல், தங்கள் முழு ஆயுட்காலத்திலும் இத்தகைய சிகிச்சையின் செலவுகளை ஈடுகட்ட போதுமான நிதி ஆதாரங்களைக் கொண்டுள்ளார்களா என்பதை விசா அதிகாரிகள் இனி மதிப்பிடுவார்கள் என்று அந்த வழிகாட்டுதலில் கூறப்பட்டுள்ளது.
மேலும், விண்ணப்பதாரரின் குடும்ப உறுப்பினர்களான குழந்தைகள் அல்லது வயதான பெற்றோருக்கு உடல்நலக் குறைபாடுகள், நாள்பட்ட மருத்துவ நிலைமைகள் அல்லது சிறப்புத் தேவைகள் இருந்தால், விண்ணப்பதாரர் வேலைவாய்ப்பைத் தக்கவைக்க முடியுமா என்பதையும் மதிப்பிட விசா அதிகாரிகள் அறிவுறுத்தப்பட்டுள்ளனர்.
மருத்துவப் பயிற்சி இல்லாத விசா அதிகாரிகள், தனிப்பட்ட சார்பு அல்லது அறிவு அடிப்படையில் மருத்துவச் செலவுகள் மற்றும் வேலைவாய்ப்பு குறித்து முடிவெடுப்பது கவலையளிப்பதாக சட்ட வல்லுநர்கள் கருத்து தெரிவித்துள்ளனர்.
