இந்தியா மற்றும் பாகிஸ்தான் இடையேயான மோதலைச் சீனா தனது சமீபத்திய இராணுவ ஆயுத அமைப்புகளைச் சோதிக்கவும், விளம்பரப்படுத்தவும் ஒரு “சாதகமான களமாக” பயன்படுத்தியது என்று அமெரிக்க நாடாளுமன்றக் குழுவின் புதிய அறிக்கை ஒன்று குற்றம் சாட்டியுள்ளது.
இந்த அறிக்கை, ‘ஆபரேஷன் சிந்தூர்’ குறித்த அதிர்ச்சியூட்டும் தகவல்களை மீண்டும் வெளிச்சத்திற்குக் கொண்டு வந்துள்ளது.
ஜம்மு-காஷ்மீரின் பஹல்காமில் நடந்த பயங்கரவாதத் தாக்குதலில் 26 பொதுமக்கள் கொல்லப்பட்டதைத் தொடர்ந்து, மே 7 ஆம் தேதி பாகிஸ்தான் மற்றும் பாகிஸ்தான் ஆக்கிரமிப்பு காஷ்மீரில் உள்ள பயங்கரவாத முகாம்களைத் தாக்கி ‘ஆபரேஷன் சிந்தூரை’த் தொடங்கியது.
பதிலுக்குப் பாகிஸ்தான் ஏவுகணைகள் மற்றும் ட்ரோன்களைப் பயன்படுத்தியது. இந்தியாவின் பதிலடித் தாக்குதலில் பல பாகிஸ்தான் விமான ஓடுதளங்கள் அழிக்கப்பட்டன. நான்கு நாட்களுக்குப் பிறகு, மே 10 ஆம் தேதி போர் நிறுத்தத்துடன் மோதல் முடிவுக்கு வந்தது.
அமெரிக்க-சீனப் பொருளாதாரம் மற்றும் பாதுகாப்புக் கண்ணோட்ட ஆணையம் வெளியிட்ட அறிக்கையின்படி, மே மாதத்தில் இந்தியா-பாகிஸ்தான் இடையே ஏற்பட்ட நான்கு நாட்கள் மோதலை, நேரடிக் களச் சோதனைக் காலமாகச் சீனா பயன்படுத்தியுள்ளது.
இந்த மோதலின்போது, சீனாவின் நவீன தளங்களான HQ-9 வான் பாதுகாப்பு அமைப்பு , PL-15 வான்-வான் ஏவுகணைகள் , மற்றும் J-10 போர் விமானங்கள் ஆகியவை முதன்முறையாகச் பயன்படுத்தப்பட்டுள்ளன. இந்த ஆயுதங்களின் “வெற்றிகளை” சீனத் தூதரகங்கள் பகிரங்கமாகப் புகழ்ந்து, ஆயுத விற்பனையை வலுப்படுத்த முயன்றதாகவும் அந்த அறிக்கை கூறுகிறது.
இந்த மோதலுக்குப் பிறகு, சீன உளவுத்துறை, பிரான்ஸின் ரஃபேல் போர் விமான விற்பனையைத் தடுக்க ஒரு தவறான பிரச்சாரத்தைத் தொடங்கியதாகவும் அறிக்கை சுட்டிக்காட்டியுள்ளது. சீன ஆயுதங்களால் அழிக்கப்பட்ட ரஃபேல் விமானத்தின் சிதைவுகள் எனக் கூறி, ஏஐ மற்றும் வீடியோ கேம் படங்களைப் போலியான சமூக ஊடகக் கணக்குகள் மூலம் பரப்பியதாகவும் அதில் குறிப்பிடப்பட்டுள்ளது.
இந்தியாவுடனான தற்போதைய எல்லைப் பதட்டங்கள் மற்றும் அதன் பாதுகாப்புத் தொழில் இலக்குகள் ஆகியவற்றின் பின்னணியில், சீனா இந்த மோதலை ஒரு வாய்ப்பாகப் பயன்படுத்திக் கொண்டதாக அமெரிக்க அறிக்கை குற்றம் சாட்டியுள்ளது.