அமைதிக்கான நோபல் பரிசு பெற வேண்டும் என்ற டொனால்ட் டிரம்பின் பிடிவாதமான கோரிக்கையை ஏற்க மறுத்ததால், இந்தியாவுக்குப் பிறகு இப்போது போலந்து நாடு அவரது கோபத்திற்கு ஆளாகியுள்ளது. அமெரிக்காவின் மிக நெருங்கிய நட்பு நாடுகளில் ஒன்றாக இருந்தபோதிலும், டிரம்ப் அமைதிப் பரிசுக்கு தகுதியானவர் அல்ல என்று அந்நாட்டு நாடாளுமன்ற சபாநாயகர் கூறியதைத் தொடர்ந்து, அவருடனான அனைத்து உறவுகளையும் அமெரிக்கா துண்டித்துள்ளது.
உலகளவில் “எட்டு போர்களை முடிவுக்குக் கொண்டு வந்ததாக” கூறிக்கொள்ளும் டிரம்ப், தான் அமைதிக்கான நோபல் பரிசுக்கு தகுதியானவர் என்று பலமுறை வாதிட்டு வருகிறார். கடந்த ஆண்டு ஜூன் மாதம், இந்தியா – பாகிஸ்தான் இடையே போர் நிறுத்தத்தை ஏற்படுத்தியதாக டிரம்ப் கூறிய கருத்தை இந்தியப் பிரதமர் நரேந்திர மோடி ‘உண்மை சரிபார்ப்பு’ மூலம் மறுத்தார். இதன் விளைவாக, இரு நாடுகளுக்கும் இடையே வர்த்தக ரீதியான உராய்வுகள் ஏற்பட்டன. தற்போது அதே போன்ற ஒரு சூழல் போலந்திற்கும் ஏற்பட்டுள்ளது.
இந்தியாவும் போலந்தும் பல ஆண்டுகளாக அமெரிக்காவின் தூண்களாக இருந்து வருகின்றன. சீனாவுக்கு எதிரான இந்தியாவின் நிலைப்பாடும், ரஷ்யாவுக்கு எதிரான நேட்டோ கூட்டணியில் போலந்தின் பங்களிப்பும் மிக முக்கியமானவை. உக்ரைன் போரின் போது லட்சக்கணக்கான அகதிகளை ஏற்றுக்கொண்ட நாடு போலந்து.
இருப்பினும், டிரம்ப் தனது தனிப்பட்ட விருப்பங்களையே வெளியுறவுக் கொள்கையாக மாற்றுகிறார். தனது இலக்கை அடைய எதையும் செய்யும் ‘டெர்மினேட்டர்’ கதாபாத்திரம் போல, நட்பு நாடுகளுடனான உறவு பாதிக்கப்பட்டாலும் அவர் கவலைப்படுவதில்லை.
இதனிடையே போலந்து நாடாளுமன்றத்தின் சபாநாயகர் வியோட்ஸிமியர்ஸ் ஜார்சாஸ்டி, 2026-ஆம் ஆண்டுக்கான நோபல் பரிசுக்கு டிரம்பின் பெயரைப் பரிந்துரைக்க மறுத்துவிட்டார்.
இது குறித்து அவர் கூறுகையில், “டிரம்ப் அமைதிக்கான நோபல் பரிசுக்கு தகுதியானவர் அல்ல. அவர் அதிகார அரசியலையும், பலத்தை மட்டுமே நம்பும் பரிவர்த்தனை அரசியலையும் பிரதிபலிக்கிறார். இது பெரும்பாலும் சர்வதேச சட்டங்களை மீறுவதாகவே அமைகிறது என கூறினார்
சபாநாயகரின் கருத்தை “அதிபர் டிரம்பிற்கு எதிரான தூண்டப்படாத அவமதிப்பு” என்று வர்ணித்த போலந்துக்கான அமெரிக்க தூதர் டாம் ரோஸ், சபாநாயகருடனான அனைத்து தொடர்புகளையும் அமெரிக்கா துண்டிப்பதாக அறிவித்தார். இது போலந்தில் கடும் கொந்தளிப்பை ஏற்படுத்தியுள்ளது.
இது குறித்து தொலைக்காட்சி சேனல் ஒன்று நடத்திய கருத்துக்கணிப்பில் 78% பேர் சபாநாயகர் தனது கருத்தில் உறுதியாக நிற்க வேண்டும் என்று வாக்களித்தனர். 22% பேர் சபாநாயகர் கருத்தைத் திரும்பப் பெற வேண்டும் என்று கருதினர்.
போலந்து பிரதமர் டொனால்ட் டஸ்க் இது குறித்துப் கூறுகையில், “நட்பு நாடுகள் ஒருவரை ஒருவர் மதிக்க வேண்டும், பாடம் நடத்தக் கூடாது,” என அமெரிக்கத் தூதரைச் சாடினார்.
முன்னாள் துணைப் பிரதமர் ரோமன் கியர்டிச், டிரம்பின் விருதுக் கோரிக்கையை ரோம் பேரரசன் நீரோவின் வீண் பெருமையுடன் ஒப்பிட்டுள்ளார். நீரோ தனது கலைத்திறனுக்காகப் பாராட்டை எதிர்பார்த்தது எப்படி அந்தப் பேரரசின் வீழ்ச்சிக்குத் தொடக்கமாக அமைந்ததோ, அதுபோலவே டிரம்பின் இந்த நடவடிக்கைகளும் அமையும் என எச்சரித்துள்ளார்.
இந்தியாவின் இறக்குமதிகள் மீது அமெரிக்கா 50% வரி விதித்தபோது, அது டிரம்பின் கோபத்தின் வெளிப்பாடாகவே பார்க்கப்பட்டது. அதே பாணியில், இப்போது போலந்துடனான உறவிலும் விரிசல் ஏற்பட்டுள்ளது. ஒரு தனிப்பட்ட விருதிற்காக, பல ஆண்டு கால நட்பு நாடுகளைப் பகைத்துக் கொள்வது அமெரிக்காவின் வெளியுறவுக் கொள்கையில் ஒரு பலவீனமான கட்டத்தையே காட்டுகிறது.
