அமெரிக்க அதிபர் டொனால்ட் ட்ரம்ப் மற்றும் ஜப்பான் பிரதமர் சானே தாகைச்சி இடையிலான சமீபத்திய சந்திப்பு, உலக அளவில் கவனத்தை ஈர்த்துள்ளது. குறிப்பாக, ஈரான் மீதான தாக்குதல் குறித்துப் பேசுகையில், இரண்டாம் உலகப் போரின் கசப்பான நினைவான ‘பேர்ல் ஹார்பர்’ சம்பவத்தை ட்ரம்ப் குறிப்பிட்டது பெரும் விவாதத்தைக் கிளப்பியுள்ளது.
இருதரப்பு செய்தியாளர் சந்திப்பில், ஜப்பானிய நிருபர் ஒருவர் ட்ரம்ப்பிடம் “ஈரான் மீது தாக்குதல் நடத்துவதற்கு முன்னதாக, ஜப்பான் உள்ளிட்ட ஆசிய மற்றும் ஐரோப்பிய நட்பு நாடுகளுக்கு அமெரிக்கா ஏன் தகவல் தெரிவிக்கவில்லை?” என்று ஒரு கேள்வியை எழுப்பினார்:
இந்தக் கேள்விக்குத் தனது பாணியில் பதிலளித்த ட்ரம்ப், தாக்குதலில் ரகசியம் எவ்வளவு முக்கியம் என்பதை விளக்கினார். “நாங்கள் ஒரு தாக்குதலில் இறங்கும்போது மிகக் கடுமையாகச் செயல்படுவோம். எதிரியைத் திணறடிக்க வேண்டும் என்பதால் யாரிடமும் அதைச் சொல்லவில்லை” என்று கூறியவர், திடீரென ஜப்பான் பிரதமரை நோக்கித் திரும்பினார்.
“திடீர் தாக்குதல் பற்றி ஜப்பானை விட வேறு யாருக்குத் தெரியும்? அன்று பேர்ல் ஹார்பர் பற்றி நீங்கள் ஏன் என்னிடம் சொல்லவில்லை?” என்று ட்ரம்ப் கிண்டலாகக் கேட்டார்.
மேலும், “எங்களை விட நீங்கள் தான் திடீர் தாக்குதல்களில் அதிக நம்பிக்கை கொண்டவர்கள் என்று நினைக்கிறேன்” என்றும் அவர் தொடர்ந்தார்.
ட்ரம்ப்பின் இந்த எதிர்பாராத பேச்சால் ஜப்பான் பிரதமர் சானே தாகைச்சி ஒரு நிமிடம் திகைத்துப் போனார்.
1941 டிசம்பர் 7-ம் தேதி, ஹவாயில் உள்ள அமெரிக்கக் கடற்படைத் தளமான பேர்ல் ஹார்பர் மீது ஜப்பான் நடத்திய திடீர் வான்வழித் தாக்குதலில் 2,390 அமெரிக்கர்கள் கொல்லப்பட்டனர். அன்றைய அமெரிக்க அதிபர் பிராங்க்ளின் டி ரூஸ்வெல்ட் இதனை “அவமானத்தில் நிலைத்திருக்கும் ஒரு நாள்” என்று வர்ணித்தார். இந்தச் சம்பவமே அமெரிக்கா இரண்டாம் உலகப் போரில் நேரடியாகக் குதிக்கக் காரணமாக அமைந்தது.
அமெரிக்கா மற்றும் இஸ்ரேல் இணைந்து ஈரானில் நடத்திய தாக்குதலின் வெற்றியை ட்ரம்ப் விவரித்தார். “ரகசியத்தைப் பேணியதால்தான் முதல் இரண்டு நாட்களிலேயே நாங்கள் எதிர்பார்த்ததை விட 50% அதிகமான இலக்குகளை எங்களால் அழிக்க முடிந்தது. நான் எல்லாரிடமும் முன்னரே சொல்லியிருந்தால், அதில் ரகசியம் இருந்திருக்காது” என்று அவர் விளக்கினார்.
