திருமயத்தில் நள்ளிரவில் பூட்டியிருந்த ஜவுளிக்கடையின் வெளியில் புத்தாடைகள் தொங்கிக்கொண்டிருந்ததைப் பார்த்து கடையின் உரிமையாளருக்கு போன் செய்து தகவல் கொடுத்த இளைஞர்களுக்கு பாராட்டு தெரிவிக்கப்பட்டது.
புதுக்கோட்டை மாவட்டம், திருமயத்தில் ஓய்கா என்ற ஜவுளிக்கடை இயங்கி வருகிறது. இந்நிலையில் கடையின் பணியாளர் கடையை மட்டும் மூடிவிட்டு வெளியே இருந்த உடைகளை எடுத்து உள்ளே வைக்க மறந்து விட்டுச் சென்றுள்ளார்.
இந்நிலையில் அப்பகுதிக்கு இரவு நேரத்தில் நண்பர்களுடன் தேனீர் அருந்த வந்த இளைஞர்கள் சிலர் கடையின் உடைகள் வெளியே தொங்குவதை பார்த்துள்ளனர். உடனே அந்த இளைஞர்கள் உடனே கடையின் உரிமையாளருக்கு தொலைபேசியில் அழைத்து தகவல் தந்ததோடு அதனை இன்ஸ்டகிராம் சமூக வலைதளத்தில் பதிவிட்டுள்ளனர்.
இதனையடுத்து அந்தக் கடையின் உரிமையாளர் இளைஞர்களை நேரில் அழைத்து விருதுகள் வழங்கி பொன்னாடை அணிவித்து கௌரவித்தார்.
