உத்திரமேரூரில் மாணவிக்கு மன உளைச்சல் மற்றும் பாலியல் தொல்லை கொடுத்த தனியார் பள்ளி ஆசிரியர் மீது வழக்கு பதிவு செய்யப்பட்டுள்ளது பரபரப்பை ஏற்படுத்தி உள்ளது.
காஞ்சிபுரம் மாவட்டம் உத்திரமேரூர் அருகே வசிக்கும் பள்ளி மாணவி அருகில் உள்ள ஆர்.என். கண்டிகை பகுதியில் உள்ள தனியார் பள்ளியில் படித்து வருகிறார்.
இந்நிலையில் வழக்கம்போல் பள்ளி முடிந்து விட்டு வெளியே வரும்போது பள்ளியில் பணிபுரியும் இளநகர் பகுதியைச் சேர்ந்த ஆசிரியர் குப்பன் , மாணவியின் கையைப் பிடித்து இழுத்து தேர்வுக்கு கொடுக்கவுள்ள கேள்வி தாள் மற்றும் அதற்கான விடைகளை தருவதாக கூறிக்கொண்டு அவரின் செல்போன் எண்ணினை பெற்றுள்ளார்.
இதனைத் தொடர்ந்து அந்த மாணவிக்கு தொடர்ந்து போன் செய்து மன உளைச்சல் அளித்தும் பாலியல் தொல்லை தந்ததாக அவரது தாயின் புகாரின் பேரில், ஆசிரியர் குப்பன் மீது காஞ்சிபுரம் அனைத்து மகளிர் காவல் நிலையத்தில் வழக்கு பதிவு செய்யப்பட்டுள்ளது.
ஏற்கனவே அந்த பள்ளியில் பயிலும் சிறுமிக்கு பாலியல் தொல்லை தந்ததாக புகார் பெறப்பட்டு வழக்கு பதிவு செய்யப்பட்ட நிலையில் மீண்டும் அதே பள்ளியில் பணிபுரியும் ஆசிரியர் மீதும் பாலியல் குற்றச்சாட்டில் வழக்கு பதிவு செய்யப்பட்டுள்ளது குறிப்பிடத்தக்கது.
