தமிழக வெற்றி கழகத்தின் ஆலங்குளம் சட்டமன்ற தொகுதி தென்காசி தெற்கு மாவட்ட செயலாளராக ஆலங்குளத்தை சேர்ந்த டி பி வி வி. விபின் சக்கரவர்த்தி நியமனம் செய்யப்பட்டுள்ளார். அவர் மாவட்ட செயலாளராக சென்னையில் பதவியேற்று தனது சொந்த ஊரான ஆலங்குளத்திற்கு நேற்று மாலை திரும்பினார். அவரை வரவேற்பதற்காக தமிழக வெற்றிக்கழக நிர்வாகிகள் தடபுடல் ஏற்பாடுகளை செய்திருந்தனர்.
தென்காசி மாவட்ட எல்லையான மாறாந்தையில் வைத்து நூற்றுக்கும் மேற்பட்ட பெண்கள் மற்றும் கட்சி நிர்வாகிகள் விபின் சக்கரவர்த்திக்கு பூரண கும்ப மரியாதை உடன் வரவேற்பு அளித்து அதனைத் தொடர்ந்து ஆலங்குளம் பேருந்து நிலையம் அருகில் உள்ள காமராஜர் சிலை அருகில் வைத்து திமுக அதிமுகவினரையே மிஞ்சும் அளவிற்கு வரவேற்புக்கு ஏற்பாடு செய்யப்பட்டிருந்தது.
வரவேற்பு நிகழ்ச்சிக்காக கட்சி நிர்வாகிகள் மற்றும் பொதுமக்களை கவரும் விதத்தில் அப்பகுதியில் ஆயிரக்கணக்கானோர் கூடியிருக்க கரகாட்டம் , மயிலாட்டம் ஒயிலாட்டத்துடன் பாரம்பரிய நாதஸ்வர இசை மற்றும் கேரள செண்டை மேளம் முழங்க 50க்கும் மேற்பட்ட பெண்கள் ஆரத்தி எடுத்து மலர்தூவி மாவட்ட செயலாளர் விபின் சக்கரவர்த்தியை வரவேற்றனர்.
பின்னர் அவருக்கு சுமார் 100 கிலோ மலர்களால் கட்டப்பட்டிருந்த பிரமாண்ட மாலை அணிவிக்கப்பட்டது. கட்சி நிர்வாகிகள் மற்றும் ஆலங்குளம் வர்த்தக சங்க நிர்வாகிகள் முக்கிய பிரமுகர்கள் அவருக்கு சால்வை மற்றும் மாலை அணிவித்து வாழ்த்து தெரிவித்தனர். வரவேற்பை ஏற்றுக் கொண்ட விபின் சக்கரவர்த்தி காமராஜர் சிலைக்கு மாலை அணிவித்து மரியாதை செய்தார்.
கட்சி நிர்வாகிகள் அவருக்கு வீரவாளை பரிசளித்தனர். வாளை பெற்றுக் கொண்ட அவர் வாளை கையில் ஏந்தி கூட்டத்தினருடன் நடிகர் விஜய் போல் நானும் செல்பி எடுத்துக் கொண்டார்.
அதனைத் தொடர்ந்து மேளதாளம் முழங்க 300க்கும் மேற்பட்ட இளைஞர் பட்டாளத்துடன் திறந்த காரில் சுமார் ஒரு கிலோ மீட்டர் தூரம் ஊர்வலமாக வரவேற்பு நிகழ்ச்சி நடைபெறும் மண்டபத்திற்கு அழைத்துச் செல்லப்பட்டார். அங்கும் அவருக்கு முக்கிய பிரமுகர்கள் கட்சி நிர்வாகிகள் வாழ்த்து தெரிவிக்கும் நிகழ்ச்சி நடைபெற்றது.
அதனைத் தொடர்ந்து 1500 பேருக்கு உணவு வழங்கப்பட்டது.திமுக, அதிமுக் வினரை மிஞ்சும் வகையில் நடந்த தடபுடல் வரவேற்பு பொதுமக்களை வியப்பில் ஆழ்த்தியதுடன் ஆளும் கட்சி மற்றும் எதிர்க் கட்சியினரிடயே கலக்கத்தை ஏற்படுத்தி உள்ளது.
2026 சட்டமன்றத் தேர்தலில் ஆலங்குளத்தில் இவர்தான் வேட்பாளராக நிறுத்தப்படுவார் எனவும் இவர் வேட்பாளராக நிறுத்தப்பட்டால் திமுக மற்றும் அதிமுகவுக்கு நிகராக வாக்குகளை பெறுவார் எனவும் கட்சியினர் பேசிக்கொண்டனர்.
