நாமக்கல்:
நாமக்கல் கலெக்டர் ஆபீசில், கந்து வட்டி கொடுமையில் இருந்து காப்பாற்றக்கோரி, பெண் ஒருவர் தீக்குளிக்க முயன்றதால் பரபரப்பு ஏற்பட்டது.
நாமக்கல் அருகே உள்ள, வேட்டாம்பாடியை சேர்ந்தவர் ஜிலானி (42). இவர், சேந்தமங்கலத்தை சேர்ந்த ஒருவரிடம் கந்துவட்டிக்கு ரூ. 6 லட்சம் ரூபாய் கடன் வாங்கினர். அதற்காக புரோநோட் எழுதிக் கொடுத்துள்ளார். இதுவரை அசலும் வட்டியுமாக ரூ. 13 லட்சம் வரை அவர் கட்டியுள்ளார்.
ஆனால் இன்னும் அசல் பணம் செலுத்த வேண்டும் என பணம் கொடுத்தவர் மிரட்டியுள்ளார். இது குறித்து அவர் 2022ம் ஆண்டு, நாமக்கல் போலீஸ் ஸ்டேசனில் புகார் அளித்துள்ளார். இதற்கிடையில், பணம் கொடுத்தவர் ஜிலானியின் வீட்டை ஜப்தி செய்ய கோர்ர்ட்டில் வழக்கு தொடர்ந்துள்ளார்.
அதில் இன்னும் ரூ. 14.51 லட்சம் பணம் தர வேண்டும் என அவர் கேட்டுள்ளார். இதனால் ஜிலானி மன உளைச்சலுக்கு ஆளானார். இந்தநிலையில், கலெக்டர் ஆபீசில் நேற்று, மாவட்ட வளர்ச்சி மற்றும் கண்காணிப்பு குழு கூட்டம் முடித்து, கலெக்டர் துர்கா மூர்த்தி, எம்.பி.,க்கள் ராஜேஸ்குமார், மாதேஸ்வரன் ஆகியோர் கலெக்டர் ஆபீஸ் போர்ட்டிகோவிற்கு வந்தனர்.
அப்போது, அங்கு வந்து காத்திருந்த ஜிலானி, திடீரென தன்னிடம் மறைத்து வைத்திருந்த கேனில் இருந்த மண்ணெண்ணையை உடலில் ஊற்றி தீக்குளிக்க முயன்றார். அதிர்ச்சி அடைந்த பாதுகாப்பு பணியில் ஈடுபட்டிருந்த போலீசார் மற்றும் அலுவலர்கள் உடனடியாக, அவரை தடுத்து அவர் மீது தண்ணீர் ஊற்றினர். தொடர்ந்து, கலெக்டர் துர்கா மூர்த்தி, ஜிலானியிடம் விசாரணை நடத்தினார்.
அவரிடம் இருந்து மனுவை பெற்றுக் கொண்ட கலெக்டர், இது குறித்து நடவடிக்கை எடுப்பதாக அவருக்கு ஆறுதல் கூறினார். மேலும், ஜிலானி கொடுத்த மனு மீது உடனடியாக நடவடிக்கை எடுக்க, அதிகாரிகளுக்கு அவர் உத்தரவிட்டார். எம்.பி.,க்கள் ராஜேஸ்குமார், மாதேஸ்வரன் ஆகியோர், 108 ஆம்புலன்ஸ் வண்டியை வரவழைத்து, அவரை நாமக்கல் அரசு மருத்துவக்கல்லூரி ஆஸ்பத்திரிக்கு சிகிச்சைக்காக அனுப்பி வைத்தனர்.
கந்து வட்டி கொடுமையில் இருந்து பாதுகாக்கக்கோரி பெண் ஒருவர், கலெக்டர் ஆபீசில் தீக்குளிக்க முயன்றதால் பரபரப்பு ஏற்பட்டது.
