நாமக்கல்:
புத்த, சமன மற்றும் சீக்கியர்கள் புனித பயணம் மேற்கொள்ள நிதி உதவிக்கு விண்ணப்பங்கள் வரவேற்கப்படுகின்றன.
இது குறித்து நாமக்கல் கலெக்டர் துர்காமூர்த்தி வெளியிட்டுள்ள செய்திக்குறிப்பில் கூறியுள்ளதாவது:
தமிழ்நாட்டைச் சேர்ந்த 50 புத்த மதத்தினர், 50 சமண மதத்தினர் மற்றும் 20 சீக்கிய மதத்தினர் இந்தியாவில் உள்ள அவரவர் மதங்களுக்கான புனித தலங்களுக்கு புனித பயணம் மேற்கொள்வதற்காக, தமிழக அரசால் ஆண்டுதோறும் நபர் ஒருவருக்கு ரூ. 10,000 வீதம் 120 நபர்களுக்கு ரூ. 12 லட்சம் நிதி உதவி வழங்ப்படுகிறது. இந்த திட்டத்தின் கீழ் பயணம் மேற்கொண்டு பயன்பெற விரும்பும் புத்த, சமண மற்றும் சீக்கியர்களிடமிருந்து விண்ணப்பங்கள் வரவேற்கப்படுகிறது.
இப்புனித பயணம் புத்த மத தொடர்புடைய பீகாரில் உள்ள புத்த கயா, ராஜ்கிர், வைஷாலி, உ.பியில் உள்ள குசிநகர், வாரணாசியில் உள்ள சாரநாத் கோவில், நேபாளத்தில் உள்ள லும்பினி போன்ற புனித தலங்களுக்கும், சமண மத தொடர்புடைய ராஜஸ்தானில் உள்ள தில்வாரா கோவில், ரணக்பூர் சமண கோவில், ஜெய்சால்மர் சமண கோவில், ஜார்கண்டில் உள்ள சிக்கர்ஜி, குஜராத்தில் உள்ள பாலிடனா, பீகாரில் உள்ள பவபுரி சமண கோவில் போன்ற இடங்கள், கர்நாடகாவில் சரவணபெலகோலா போன்ற புனித தலங்களுக்கு செல்லலாம். சீக்கிய மத தொடர்புடைய பஞ்சாப்பில் உள்ள அமிர்தசரஸ், தக்ட் ஸ்ரீகேசகர் சாகிப், தக்ட் ஸ்ரீடாம்டமா சாகிப், பீகாரில் உள்ள தக்ட் ஸ்ரீ ஹர்மந்திர் சாகிப் (குரு கோவிந்த் சிங்), தக்ட் ஸ்ரீ ஹசூர் சாகிப் (மஹாராஷ்டிரா) போன்ற புனித தலங்களுக்கு யாத்திரை மேற்கொள்ளலாம்.
இத்திட்டத்தின் கீழ் 1.7.2025க்கு பிறகு புனித பயணம் மேற்கொள்பவர்களுக்கு இசிஎஸ் முறையில் நேரடியாக மானியம் வழங்கப்படுகிறது. இதற்கான விண்ணப்ப படிவங்கள், கலெக்டர் அலுவலகத்தில் உள்ள, பிற்படுத்தப்பட்டோர் மற்றும் சிறுபான்மையினர் நல அலுவலகத்தில் கட்டணமின்றி பெறலாம். மேலும் பிசிஎம்பிசிஎம்டபிள்யு.டிஎன்.ஜிஓவி.இன் என்ற வெப்சைட்டில் இருந்தும் டவுன் லோடு செய்துகொள்ளலாம். பூர்த்தி செய்யப்பட்ட விண்ணப்பத்தை 30.11.2025க்குள் உரிய ஆவணங்களுடன், ஆணையர், சிறுபான்மையினர் நலத்துறை, கலசமஹால் பாரம்பரிய கட்டிடம், சேப்பாக்கம், சென்னை-5 என்ற முகவரிக்கு அனுப்பி வைக்கவேண்டும். நாமக்கல் மாவட்டத்தை சேர்ந்த புத்த, சமண மற்றும் சீக்கியர் மதத்தினர்கள், புனித பயணம் மேற்கொள்வதற்கு இந்த திட்டத்தின்மூலம் விண்ணப்பித்து பயன்பெறலாம் என தெரிவிக்கப்பட்டுள்ளது.
