சட்டசபை தேர்தலில், நாமக்கல் மாவட்டம் மொத்தம் 91.41 சதவீதம் வாக்கு பதிவு நடைபெற்றுள்ளது. இதன் மூலம், மாநில அளவில் இரண்டாமிடம் பெற்று சாதனை படைத்தது.
நாமக்கல் மாவட்டத்தில், ராசிபுரம், சேந்தமங்கலம், நாமக்கல், ப.வேலூர், திருச்செங்கோடு, குமாரபாளையம் என, 6 சட்டசபை தொகுதிகள் உள்ளன. அவற்றில், தி.மு.க., அ.தி.மு.க., பா.ஜ., த.வெ.க., நா.த.க., மற்றும் சுயேட்சைகள் உள்பட 132 பேர் போட்டியிடுகின்றனர். அவர்களுக்காக, மாவட்டத்தில் மொத்தம் 1,781 வாக்குச்சாவடிகள் அமைக்கப்பட்டுள்ளது. அதில், ஒவ்வொரு சட்டசபை தொகுதிகளிலும், வாக்குச்சாவடி தலைமை அலுவலர், வாக்குச்சாவடி அலுவலர், 1, 2, 3 என, 8,544 பேர் பணியில் ஈடுபடுத்தப்பட்டனர்.
ராசிபுரம் தொகுதியில் மொத்தம் 2 லட்சத்து, 22,252 வாக்காளர்கள் உள்ளனர். சேந்தமங்கலத்தில் 2 லட்சத்து, 29,398, நாமக்கல்லில் 2 லட்சத்து 37,836, ப.வேலூரில் 2 லட்சத்து 5,147, திருச்செங்கோட்டில் 2 லட்சத்து 9,072, குமாரபாளையத்தில் 2 லட்சத்து, 20,048 என, மொத்தம் 13 லட்சத்து, 23,753 வாக்காளர்கள் உள்ளனர்.
கடந்த 23ம் தேதி காலை, 7:00 மணிக்கு வாக்குப்பதிவு துவங்கி, மாலை, 6:00 மணிக்கு முடிந்தது. துவக்கம் முதலே வழக்கத்தை காட்டிலும் அதிக அளவில் மக்கள் வந்து, தங்களது ஜனநாயக கடமையை நிறைவேற்றினர். அதன் காரணமாக, வாக்கு சதவீதமும் அதிகரித்தது.
இறுதி நிலவரப்படி, ராசிபுரத்தில் 91.82 சதவீதம், சேந்தமங்கலத்தில் 91.15 சதவீதம், நாமக்கல்லில் 89.03 சதவீதம், ப.வேலூரில் 91.54 சதவீதம், திருச்செங்கோடு 91.43 சதவீதம், குமாரபாளையத்தில் 93.70 சதவீதம் வாக்குகள் பதிவானது.
மாவட்டத்தில் உள்ள 6 சட்டசபை தொகுதிகளிலும் சேர்த்து மொத்தம் 11 லட்சத்து 94,125 வாக்குகளும், 15,910 தபால் வாக்குகளும் என, மொத்தம் 12 லட்சத்து 10,035 வாக்குகள் பதிவானது. மொத்தம் 91.41 சதவீதம் வாக்குப்பதிவு நடைபெற்றுள்ளது.
கடந்த 2021ல் சட்டசபை தேர்தலில், நாமக்கல் மாவட்டத்தில் 80.04 சதவீதம் வாக்குகள் பதிவானது. கடந்த தேர்தலைவிட இந்த தேர்தலில் 11.37 சதவீதம் வாக்குப்பதிவு அதிகரித்துள்ளது குறிப்பிடத்தக்கது. இதன் மூலம், நாமக்கல் மாவட்டம் 91.41 சதவீதம் வாக்குகள் பதிவு பெற்று, மாநில அளவில், இரண்டாமிடம் பெற்று சாதனை படைத்துள்ளது.
கரூர் மாவட்டம் 92.2 சதவீதம் வாக்குகள் பதிவு பெற்று முதலிடத்தைப் பெற்றுள்ளது.
