புதுக்கோட்டை மாவட்ட ஆட்சியர் அலுவலகத்தில் நடைபெற்ற நிகழ்வில் புதுக்கோட்டை மாவட்ட நிர்வாகம், தமிழ்நாடு அறிவியல் இயக்கம் இணைந்து நடத்தும் எட்டாவது புதுக்கோட்டை புத்தகத் திருவிழா அக்டோபர் மாதம் 3ம் தேதி வெள்ளிக்கிழமை முதல் 12ம் தேதி ஞாயிற்றுக்கிழமை வரை 10 நாள்கள் நகர்மன்றத்தில் நடத்தப்படும் என மாவட்ட ஆட்சியரும், புத்தகத் திருவிழாவின் தலைவருமான அருணா ஐ.ஏ.எஸ். புத்தகத் திருவிழாவிற்கான விழா பதாகையை வெளியிட்டார்.
பின்னர் மாவட்ட ஆட்சியர் கூறுகையில், புத்தகத் திருவிழாவில் தினந்தோறும் காலை மற்றும் மாலை நேர கலை நிகழ்வுகள், நூற்றுக்கும் மேற்பட்ட புத்தக அரங்குகள், அறிவியல், கணித, தொல்லியல், கண்காட்சிக்கூடங்கள், தமிழ்நாடு அறிவியல் தொழில்நுட்ப மையத்தின் மூலமாக வான்நோக்கு நிகழ்வு கோளரங்கம், வானவில் மன்றத்தின் மூலமாக எளிய அறிவியல் பரிசோதனைகள், ஏன்? எதற்கு? எப்படி? போன்ற மாணவர்கள் சிந்திக்க கூடிய வகையில் காலை அறிவியல் அமர்வுகள் போன்றவை நடைபெறும்
இந்நிகழ்வில் பள்ளி கல்லூரி மாணவர்களின் மாலை நேர கலை நிகழ்ச்சிகள், அறிவியல் அறிஞர்களின் சொற்பொழிவுகள், சிறப்பு பேச்சாளர்களின் கலை இலக்கிய உரைகள் ஆகியவை நிகழ்த்தப்படும்.
இதில் முன்னணி புத்தக பதிப்பகங்கள் கலந்துகொள்வார்கள் எனவும் இதை பொதுமக்கள், எழுத்தாளர்கள், மாணவர்கள், ஆசிரியர்கள் என அனைவரும் பயன்படுத்திக்கொள்ள வேண்டும் எனவும் கேட்டுக்கொண்டார்.
இந்நிகழ்வில் புதுக்கோட்டை மாவட்ட ஆட்சியர் நேர்முக உதவியாளர் (பொது) .முருகேசன், மாவட்ட ஆட்சியரின் நேர்முக உதவியாளர் (வளர்ச்சி) ஞானம், மாவட்ட நூலக அலுவலர் கார்ல் மார்க்ஸ், புத்தகத் திருவிழா ஒருங்கிணைப்பாளர்கள் மணவாளன், வீரமுத்து, கவிஞர் ஜீ.வி, முத்துக்குமார், எழுத்தாளர் ராசி. பன்னீர்செல்வம், கவிஞர் கீதா ஆகியோரும் நேரு யுவகேந்திரா மாவட்ட உதவி திட்ட அலுவலர் முனைவர். நமச்சிவாயம் தமிழ்நாடு அறிவியல் இயக்க மாவட்ட நிர்வாகிகள் முனைவர் பிச்சைமுத்து கவிஞர் சாமி. கிரிஷ், ஜெரினாபேகம், கவிஞர் கவி.கார்த்திக் உள்ளிட்டோர் கலந்துகொண்டனர்.
