ஆந்திரப் பிரதேசத்தின் கர்னூல் நகருக்கு அருகே ஹைதராபாத்திலிருந்து பெங்களூருக்குச் சென்று கொண்டிருந்த பேருந்து தீப்பிடித்து எரிந்ததில் குறைந்தது 20 பேர் கருகி உயிரிழந்தனர்.
வெள்ளிக்கிழமை அதிகாலை 3.30 மணியளவில் தேசிய நெடுஞ்சாலை 44 இல் இந்த விபத்து நடந்தது. தீப்பிடித்து எரிந்தபோது, பேருந்தில் 44 பேர் இருந்தனர்.
விபத்துக்கு என்ன காரணம்?
தகவல்களின்படி, பேருந்து ஒரு மோட்டார் சைக்கிள் மீது மோதியதில் பைக் பேருந்தின் கீழ் இழுத்துச் செல்லப்பட்டு எரிபொருள் தொட்டியில் மோதியது. இதனால் ஏற்பட்ட தீப்பிழம்புகள் வாகனம் முழுவதும் வேகமாக பரவியதாக போலீசார் தெரிவித்தனர்.
ஷார்ட் சர்க்யூட் காரணமாக பேருந்து கதவு அடைக்கப்பட்டிருந்ததால் சில நிமிடங்களில் வாகனம் முற்றிலுமாக எரிந்து சேதமடைந்ததாக போலீசார் மேலும் தெரிவித்தனர்.
பெரும்பாலான பயணிகள் தூங்கிக் கொண்டிருந்தபோது இந்த விபத்து நிகழ்ந்தது. இருப்பினும், விபத்துக்குப் பிறகு விழித்திருந்தவர்கள் அல்லது விழித்தெழுந்தவர்கள் ஜன்னல்களை உடைத்து தப்பினர். உயிர் பிழைத்தவர்களில் பெரும்பாலோர் 25 முதல் 35 வயதுக்குட்பட்டவர்கள் என்றும், இரண்டு குழந்தைகள் மற்றும் இரண்டு ஓட்டுநர்களும் தீயில் இருந்து தப்பித்ததாகவும் கூறப்படுகிறது.
விபத்து நடந்த உடனேயே பேருந்து ஓட்டுநர்கள் சம்பவ இடத்திலிருந்து தப்பிச் சென்றதாகக் கூறப்படுகிறது. அவர்களைத் தேடும் பணியில் காவல்துறையினர் ஈடுபட்டுள்ளனர். மேலும், அவர்கள் மீது வழக்குப் பதிவு செய்யப்பட்டுள்ளது.
துபாயில் தற்போது அதிகாரப்பூர்வ சுற்றுப்பயணம் மேற்கொண்டுள்ள ஆந்திரப் பிரதேச முதல்வர் என். சந்திரபாபு நாயுடு , இந்த துயரமான உயிரிழப்புக்கு ஆழ்ந்த வருத்தம் தெரிவித்தார். இந்த சம்பவம் குறித்து அதிகாரிகள் அவரிடம் விளக்கினர். அதைத் தொடர்ந்து, விபத்து நடந்த இடத்திற்கு விரைந்து சென்று மீட்பு மற்றும் நிவாரண நடவடிக்கைகளை மேற்பார்வையிடுமாறு தலைமைச் செயலாளர் மற்றும் மூத்த அதிகாரிகளுக்கு அவர் உத்தரவிட்டார்.
காயமடைந்தவர்களுக்கு சிறந்த மருத்துவ சிகிச்சை அளிக்கப்பட வேண்டும் என்றும், இறந்தவர்களின் குடும்பங்களுக்கு சாத்தியமான அனைத்து உதவிகளையும் வழங்க வேண்டும் என்றும் அவர் அறிவுறுத்தினார். இறப்பு எண்ணிக்கை அதிகரிப்பதைத் தடுக்க நடவடிக்கை எடுக்கவும், விபத்துக்கான காரணம் குறித்து முழுமையான விசாரணை நடத்தவும் முதலமைச்சர் வலியுறுத்தினார்.
கருகிய உடல்களை அடையாளம் காண தடயவியல் குழுக்கள் நிறுத்தப்பட்டுள்ளன, மேலும் தேவைப்பட்டால் டி.என்.ஏ சோதனைகள் நடத்தப்படலாம்.
