மகாராஷ்டிர மாநில துணை முதல்வரும், தேசியவாத காங்கிரஸ் கட்சித் தலைவருமான அஜித் பவார் இன்று காலை நடைபெற்ற கோர விமான விபத்தில் உயிரிழந்தார். இந்தச் செய்தி ஒட்டுமொத்த இந்திய அரசியலிலும் பெரும் அதிர்வலைகளை ஏற்படுத்தியுள்ளது.
விபத்து நடந்தது எப்படி?
இன்று காலை சுமார் 8.10 மணியளவில் மும்பையிலிருந்து பாராமதி நோக்கி அஜித் பவார் ஒரு சிறிய ரக விமானத்தில் புறப்பட்டார். அடுத்த மாதம் நடைபெறவிருந்த உள்ளாட்சித் தேர்தல்கள் தொடர்பாக நான்கு முக்கிய பொதுக்கூட்டங்களில் பங்கேற்பதற்காக அவர் பாராமதி சென்று கொண்டிருந்தார்.
சுமார் 8.40 மணியளவில் பாராமதி விமான நிலையத்தை நெருங்கிய போது, விமானம் தரையிறங்குவதற்கு முயற்சி செய்தது. முதல் முயற்சி தோல்வியடைந்த நிலையில், இரண்டாவது முறையாகத் தரையிறங்க முயன்றபோது கட்டுப்பாட்டை இழந்த விமானம், ஓடுதளத்திற்கு 100 அடி முன்பாகவே விழுந்து விபத்துக்குள்ளானது. விழுந்த வேகத்தில் விமானம் தீப்பிடித்து எரியத் தொடங்கியது.
இந்த விபத்தில் அஜித் பவார் (66) சம்பவ இடத்திலேயே உயிரிழந்தார். அவருடன் பயணித்த இரண்டு விமானிகள் மற்றும் பாதுகாப்பு அதிகாரிகள் இருவர் என மொத்தம் ஐந்து பேர் இந்த விபத்தில் பலியாகினர். விபத்து நடந்த இடத்தில் எடுக்கப்பட்ட வீடியோக்களில் விமானம் முற்றிலும் சிதைந்து தீப்பிடித்து எரிவது காண்போரை நிலைகுலையச் செய்தது.
அஜித் பவாரின் மறைவுக்குப் பிரதமர் நரேந்திர மோடி தனது ஆழ்ந்த இரங்கலைத் தெரிவித்துள்ளார். அவர் வெளியிட்டுள்ள எக்ஸ் பதிவில், “அஜித் பவார் ஒரு மக்கள் தலைவர். நிர்வாகத் திறமையும், ஏழை எளிய மக்கள் மீது அக்கறையும் கொண்ட அவரது மறைவு மிகுந்த அதிர்ச்சியையும் வேதனையையும் அளிக்கிறது” என்று குறிப்பிட்டுள்ளார்.
மத்திய அமைச்சர்கள் அமித் ஷா, ராஜ்நாத் சிங் மற்றும் காங்கிரஸ் தலைவர் மல்லிகார்ஜுன கார்கே உள்ளிட்ட பல தலைவர்களும் தங்களது இரங்கலைப் பகிர்ந்துள்ளனர். மேற்கு வங்க முதல்வர் மம்தா பானர்ஜி இந்த விபத்து குறித்து உயர்மட்ட விசாரணை நடத்தப்பட வேண்டும் என்று வலியுறுத்தியுள்ளார்.
தேசியவாத காங்கிரஸ் நிறுவனர் சரத் பவாரின் சகோதரர் மகனான அஜித் பவார், நான்கு வெவ்வேறு முதல்வர்களின் கீழ் துணை முதல்வராகப் பணியாற்றிய அனுபவம் கொண்டவர். கடந்த 2023-ஆம் ஆண்டு கட்சியில் ஏற்பட்ட பிளவுக்குப் பிறகு, அவர் ஆளும் தேசிய ஜனநாயகக் கூட்டணியில் இணைந்து துணை முதல்வராகப் பொறுப்பேற்றார். சமீபகாலமாக சரத் பவார் தலைமையிலான அணியுடன் மீண்டும் இணையப் போவதாகப் பேச்சுக்கள் அடிபட்ட நிலையில், அவரது மறைவு மகாராஷ்டிர அரசியலில் ஒரு பெரிய வெற்றிடத்தை ஏற்படுத்தியுள்ளது.
அஜித் பவாருக்கு சுனேத்ரா என்ற மனைவியும், பார்த் மற்றும் ஜெய் என்ற இரு மகன்களும் உள்ளனர். டெல்லியில் பட்ஜெட் கூட்டத்தொடரில் இருந்த சரத் பவார் மற்றும் சுப்ரியா சுலே ஆகியோர் அவசரமாகப் புனே விரைந்துள்ளனர்.
இந்தத் துயரமான சம்பவத்தால் மகாராஷ்டிர மாநிலமே சோகத்தில் மூழ்கியுள்ளது.
