மாலத்தீவின் ஆளரவமற்ற ஒரு தீவில், இந்திய இஸ்ரோ ராக்கெட்டின் பெரிய பாகம் ஒன்று கரை ஒதுங்கியுள்ளது. சென்ற வாரம் கண்டறியப்பட்ட இந்தச் சம்பவம், விண்வெளி பயணங்களின் போது கடலில் விழும் பாகங்கள் எவ்வளவு தூரம் பயணிக்கின்றன என்பதை உலகுக்கு உணர்த்தியுள்ளது.
மாலத்தீவின் ‘லாமு அட்டோல்’ பகுதியில் உள்ள குணஹந்தூ தீவின் அருகே இந்த பாகம் கண்டறியப்பட்டது. இது ராக்கெட்டின் நுனிப்பகுதியில் செயற்கைக்கோள்களைப் பாதுகாக்கும் ‘பேலோட் ஃபேரிங்’ எனப்படும் கவசப் பகுதியாகும். இது ஒரு ராக்கெட்டின் நுனியின் பாதுகாப்புப் பகுதியாகும், இது ஏவப்படும் போது செயற்கைக்கோள்களைப் பாதுகாக்கும்
இந்த வளைந்த வெள்ளை நிறப் பலகையில் இஸ்ரோவின் லோகோ, இந்திய தேசிய முத்திரை மற்றும் ‘2025’ என்ற ஆண்டு குறிப்பிடப்பட்டுள்ளது. வளிமண்டலத்தைக் கடந்து வரும்போது ஏற்படும் வெப்பத்தினால் உண்டான கருகிய அடையாளங்களும் அந்த பாகத்தில் காணப்படுகின்றன.
ஒரு உள்ளூர் மீனவர் தனது படகில் மீன்பிடிக்கச் சென்றபோது, கடலில் மிதந்து கொண்டிருந்த இந்தப் பெரிய பொருளைப் பார்த்துள்ளார். முதலில் அதில் உள்ள ஸ்க்ரூ மற்றும் பாகங்களை மறுசுழற்சி செய்ய எண்ணி அதை கரைக்குக் கொண்டு வந்துள்ளார். பின்னர் அந்தப் பகுதியில் இருந்த இளைஞர்கள் அதிலுள்ள இஸ்ரோ அடையாளங்களைக் கண்டு, இது ராக்கெட் பாகம் என்பதை உறுதி செய்தனர்.
இந்தத் தகவல் தெரிந்ததும் மாலத்தீவு காவல்துறையினர் முதற்கட்ட ஆய்வு நடத்தினர். மாலத்தீவு தேசிய பாதுகாப்புப் படை அந்தப் பொருளைக் கைப்பற்றி ஆய்வு செய்யத் திட்டமிட்டுள்ளது. இது குறித்து இஸ்ரோவுக்குத் தகவல் தெரிவிக்கப்பட்டுள்ளதாகத் தெரிகிறது.
ஸ்ரீஹரிகோட்டாவிலிருந்து ஏவப்படும் ராக்கெட்டுகளின் பாகங்கள் பாதுகாப்பு கருதி இந்தியப் பெருங்கடலில் விழும் வகையில் வடிவமைக்கப்படுகின்றன. கடல் நீரோட்டங்கள் மற்றும் காற்றின் திசை காரணமாக, 2025-ன் பிற்பகுதியில் ஏவப்பட்ட ராக்கெட்டின் இந்த பாகம் தெற்கு நோக்கி நகர்ந்து மாலத்தீவை அடைந்திருக்கலாம் என்று கருதப்படுகிறது. முன்னதாக, 2025 டிசம்பரில் இதே போன்ற ஒரு பாகம் இலங்கைக் கடற்கரையில் கண்டறியப்பட்டது குறிப்பிடத்தக்கது.
விண்வெளி ஆய்வில் இந்தியா எட்டி வரும் மைல்கற்கள், சில நேரங்களில் அண்டை நாடுகளின் கடற்கரைகளிலும் இப்படி ஆச்சரியமான அடையாளங்களை விட்டுச் செல்கின்றன.
