நாமக்கல்லைச் சேர்ந்த சினிமா நடிகர் கோபிகாந்தி தயாரித்துள்ள, பாஜக இசை ஆல்பம் பிரச்சார பாடல்களின், போஸ்டர் வெளியீட்டு விழா நடைபெற்றது.
நாமக்கல்லைச் சேர்ந்தவர் கோபிகாந்தி, சினிமாப்படங்களை தயாரித்து நடித்து வரும் இவர் ஆர்எஸ்ஜி சமூக சேவை மையத்தின் நிறுவி நடத்தி வருகிறார். பாஜக பிரமுகரான இவர் பாஜக ஆல்பம் என்ற பெயரில் பிரச்சார பாடல்களைக் கொண்டு இசை ஆல்பம் ஒன்றை தயாரித்துள்ளார்.
அதற்கான போஸ்டர் வெளியீட்டு விழா நாமக்கல்லில் நடைபெற்றது. நடிகர் கோபிகாந்தி இசை ஆல்பம் போஸ்டரை வெளியிட்டு, பாஜகவின் துணை அமைப்பான கிசான் மோர்ச்சா முன்னாள் மாநிலக்குழு உறுப்பினர் இளங்கோவனிடம் வழங்கினார்.
இது குறித்து நடிகர் கோபிகாந்தி கூறியதாவது: உலக அளவில் பெரிய அரசியல் கட்சியான பாஜவில் சுமார் 15 கோடிக்கும் அதிகமான உறுப்பினர்கள் உள்ளனர். பாஜ உறுப்பினர்களுக்காகவும், உலகின் அனைத்து மொழி பேசும் மக்களும் கேட்கும் வகையிலும், பாமர மக்களும் புரிந்துகொள்ளும் வகையிலும், பாஜவின் கொள்கைகளை விளக்கும் வகையில், பாஜக ஆல்பம் என்ற பிரச்சார பாடல் இசை ஆல்பத்தை உருவாக்கியுள்ளேன்.
உலக பொது மொழியான ஆங்கில வார்த்தை வரிகளைக் கொண்டு பாஜக இசை ஆல்பம் தயாரிக்கப்பட்டுள்ளது. இசையமைப்பாளர் சாய் நரேஷ் தனது குரலில் அழகாக இசை அமைத்து பாடியுள்ளார். லிரிக்ஸ் வீடியோவை எடிட்டர் தருண் உருவாக்கியுள்ளார்.
உலகம் முழுவதிலும் உள்ள பொது மக்கள் அனைவருக்கும் பிடிக்கும் வகையில் பாஜக ஆல்பம் பிரச்சார பாடல் உருவாக்கப்பட்டுள்ளது. இந்த பாஜக கொள்கை விளக்க பிரச்சார இசை ஆல்பம் விரைவில் வெளியிடப்படும் இதற்கு பாஜகவினரும், பொதுமக்களும் ஆதரவு அளிக்க வேண்டும் என கேட்டுக்கொண்டார்.
