சர்வதேச கூட்டுறவு ஆண்டு மற்றும் கூட்டுறவு தினத்தை முன்னிட்டு வரும் ஜூலை 6ம் தேதி சென்னையில் மினி மாரத்தான் போட்டி நடைபெறுகிறது.
இது குறித்து, நாமக்கல் மண்டல கூட்டுறவு சங்கங்களின் இணைப்பதிவாளர் அருளரசு வெளியிட்டுள்ள அறிக்கையில் கூறியுள்ளதாவது:
சர்வதேச கூட்டுறவு ஆண்டு மற்றும் சர்வதேச கூட்டுறவு தின கொண்டாட்டத்தை முன்னிட்டு, தமிழக கூட்டுறவு துறை சார்பில், மினி மாரத்தான் போட்டி நடத்தப்பட உள்ளது. ஒருவருக்காக எல்லோரும் ஓடுவோம், எல்லோரும் ஓடி கூட்டு உறவாகுவோம் என்கிற தலைப்பில், சமத்துவம் கூட்டுறவின் மகத்துவம், கூடுவோம் ஓடுவோம், கூட்டுறவால் உலகை வெல்வோம் என்கிற கருப்பொருளை மையமாக கொண்டு இப்போட்டி நடைபெற உள்ளது.
வருகிற ஜூலை 6ம் தேதி அதிகாலை 5.30 மணிக்க, சென்னை தீவுத்திடலில் தொடங்கும் இந்த போட்டிக்கு தமிழக கூட்டுறவுத்துறை அமைச்சர் பெரியகருப்பன் தலைமை தாங்குகிறார். சென்னை தீவுத்திடலில் தொடங்கி சுவாமி சிவானந்தா சாலை வழியாக மன்றோ சிலை சென்று, மீண்டும் சென்னை தீவுத்திடலில் போட்டி முடிவடையும்.
இப்போட்டியில் ஆண்கள் மற்றும் பெண்கள் கலந்து கொள்ளலாம். இப்போட்டியில் 18 வயதுக்கு மேற்பட்டவர்கள் கலந்துகொள்ளலாம்.
போட்டியில் வெற்றி பெறுபவர்களுக்கு முதல் பரிசாக ரூ.30 ஆயிரம், இரண் டாம் பரிசாக ரூ.20 ஆயிரம், மூன்றாம் பரிசாக ரூ.10 ஆயிரம் வீதம் ஆண்கள் மற்றும் பெண்களுக்கு தனித்தனியே வழங்கப்படும்.
இந்த மினிமாரத்தான் போட்டியில் பங்கேற்க நுழைவு கட்டணமாக ரூ.100 செலுத்த வேண்டும். மேலும் விவரங்களுக்கு tncu08@gmail.com என்ற இ-மெயில் மூலம் தொடர்புகொள்ளலாம் என தெரிவிக்கப்பட்டுள்ளது.
